ពិភពពត៌មាន: April 2015

Tuesday, April 28, 2015

លោក ប៉ែន បូណា៖ “គួរឱ្យស្ដាយគ្មានបេក្ខភាពជាស្ត្រីឈរឈ្មោះបោះឆ្នោតសមាជិកគណៈនាយក”

ប្រភពមកពី៖ news.sabay.com.kh

លោក ប៉ែន បូណា និពន្ធនាយកនៅស្ថានីយទូរទស្សន៍ PNN ដែលត្រូវបានសមាជិកក្លឹបអ្នកការសែតបោះឆ្នោតឱ្យក្លាយជាប្រធានអាណត្តិទី៥ មានអារម្ភសោកស្ដាយដែលអ្នកឈរឈ្មោះជាសមាជិកគណៈនាយកក្លឹបអ្នកកាសែតគ្មានបេក្ខភាពស្ត្រី។

“តាមពិតយើងបានខិតខំស្វែងរក ស្រាវជ្រាវ…ក្លឹបអ្នកកាសែតកម្ពុជាមិនបានបំភ្លេចទេ អំពីបេក្ខភាពនារី។ យើងបានប្រកូកប្រកាស ហើយបានបញ្ចុះបញ្ចូលបេក្ខភាពជាស្រ្តីហ្នឹងច្រើនដើម្បីឱ្យគាត់មកឈរឈ្មោះ ប៉ុន្តែជាលទ្ធផលយើងគួរឱ្យសោកស្តាយដោយសារយើងមិនបានបេក្ខនារីមកឈរឈ្មោះជាសមាជិកគណៈនាយក”។ នេះបើតាមប្រសាសន៍លោក ប៉ែន បូណា។ លោកបានអំពាវនាវ និងស្វាគមន៍ដល់បេក្ខនារី ត្រូវត្រៀមខ្លួនឈរឈ្មោះសម្រាប់ការបោះឆ្នោតអាណត្តិក្រោយៗទៀត។

ការបោះឆ្នោតកាលពីព្រឹកមិញ លោក ប៉ែន បូណា ទទួលបានសម្លេងគាំទ្រ ១៣៤ ជាប់ជាប្រធានក្លឹបអ្នកកាសែតជំនួស លោក ប៉ែន សមិទ្ធិ ដែលទទួលមរណៈភាពកាលពីពេលថ្មីៗនេះ។ លោក ឆាយ សុផល សាស្ត្រាចារ្យផ្នែកព័ត៌មានទទួលបានសម្លេងគាំទ្រ ១២៥ ត្រូវបានតែងតាំងជានាយកប្រតិបត្តិក្លឹបអ្នកកាសែត។ ចំណែកលោក ពុយ គា អ្នកកាសែតជើងចាស់ទទួលបានសម្លេងគាំទ្រ ១១៧ ត្រូវតែងតាំងជាអគ្គលេខាធិការក្លឹប។

ក្លឹបអ្នកកាសែតកម្ពុជាត្រូវបានបង្កើតឡើងកាលពីឆ្នាំ២០០០ ដែលគិតមកដល់ពេលនេះមានអាយុកាល ១៥ ឆ្នាំហើយ៕

អត្ថបទ៖មៃ សុខលីម

Wednesday, April 22, 2015

មិននឹកស្មានថា ផ្លែខ្នុរ មានប្រយោជន៍ ចំពោះសុខភាព ច្រើនដល់ថ្នាក់ នេះសោះ!

ប្រភពមកពី៖ khmerload

ផ្លែខ្នុរ ជាផ្លែឈើមួយប្រភេទ ដែលមាន រសជាតិផ្អែម ជាប់ចិត្ត ហើយមនុស្សភាគច្រើន ក៏តែងតែ ចូលចិត្តទទួលទានវា ហើយមិនតែប៉ុណ្ណោះ វាក៏បាន ជួយទៅដល់សុខភាព ផងដែរ។

តើអ្នកដឹងទេថា ផ្លែខ្នុរ មានអត្ថប្រយោជន៍ អ្វីខ្លះ?

១) ធ្វើឲ្យសម្ពាធឈាមថេរ៖ តាមការសិក្សាជាច្រើន បានរកឃើញថា អាហារណាដែលសម្បូរ ជាតិប៉ូតាស្យូម អាចជួយកាត់បន្ថយ សម្ពាធឈាម ឡើងខ្ពស់។ ចំពោះខ្នុរ មានជាតិប៉ូតាស្យូម ចំនួន ៣០៣មីលីក្រាម ក្នុងខ្នុរ ចំនួន ១០០ក្រាម ដូច្នេះប្រសិនបើអ្នក ទទួលទានវាជាប្រចាំ នឹងជួយឲ្យ សម្ពាធឈាម ស្ថិតក្នុងស្ថានភាពថេរ ហើយក៏អាច ជួយឲ្យធូរស្រាល ចំពោះអ្នកដែលមានបញ្ហា សម្ពាធឈាមខ្ពស់ ផងដែរ។

២) ល្អចំពោះស្បែក៖ ខ្នុរសម្បូរទៅដោយ ជាតិវីតាមីន A និង C ដែលជួយឲ្យ ស្បែករបស់អ្នក ក្មេង ជាងវ័យ។ បន្ថែមពីនេះទៅទៀត វាក៏បានផ្ទុក នូវជាតិ សារធាតុប្រឆាំង នឹងអុកស៊ីតកម្ម ដែលជួយឲ្យ កោសិកា លូតលាស់ បានល្អប្រសើរ។ មិនតែប៉ុណ្ណោះ ខ្នុរ បានដើរតួនាទី យ៉ាងសំខាន់ ក្នុងការ ពង្រឹង ប្រព័ន្ធភាពស៊ាំ និងការពារ ការឆ្លងមេរោគស្បែក ផ្សេងៗផងដែរ។

៣) ល្អចំពោះបេះដូង និងឆ្អឹង៖ ខ្នុរ គឺជាប្រភព ដែលផ្តល់នូវ ជាតិវីតាមីន B6 ល្អបំផុត ដែលអាចកាត់បន្ថយ អត្រា homocysteine ( អាស៊ីតអាមីណូ ដែលគ្មានជាតិប្រូតេអ៊ីន) នៅក្នុងឈាម។ បន្ថែមពីនេះទៅទៀត វាមានប្រយោជន៍ ចំពោះសុខភាពឆ្អឹង ព្រោះសម្បូរទៅដោយ ជាតិម៉ាញ៉េស្យូម និងកាល់ស្យូម ដែលជួយពង្រឹងឆ្អឹងរបស់អ្នក ឲ្យកាន់តែរឹងមាំ។ មិនតែប៉ុណ្ណោះ ផ្លែខ្នុរនេះ អាចការពារ ការប្រឈមនឹងជម្ងឺ ខះទឹកសន្លាក់ និង ជម្ងឺពុកឆ្អឹង។

៤) ទប់ទល់នឹងជម្ងឺហឺត៖ ខ្នុរមានជាតិប៉ូតាស្យូម វីតាមីនB កាល់ស្យូម ជាតិដែក ស័ង្កសី និងសារធាតុ ផ្សេងៗ ទៀតជាច្រើន។ ចំពោះអ្នករងនូវ ជម្ងឺហឺត អាចស្ងោរ មើមខ្នុរ ហើយទាញយក អាហាររូបត្ថម្ភពីវា ដើម្បីជួួយទប់ទល់នឹង ជម្ងឺហឺត។ ក្នុងនោះដែរ មើមខ្នុរ ក៏អាចព្យាបាល នូវជម្ងឺរាគ ក្តៅខ្លួន និងបញ្ហាស្បែក ផងដែរ។

៥) ជួយប្រព័ន្ធរំលាយអាហារ៖ ផ្លែខ្នុរ មានវីតាមីន C ខ្ពស់ ដែលមិនត្រឹមតែជួយ លើប្រព័ន្ធភាពស៊ាំ ប៉ុណ្ណោះទេ ថែមទាំងជួយលើ ប្រព័ន្ធរំលាយ អាហារ ថែមទៀត។ ម្យ៉ាងវិញទៀត ពិសារផ្លែខ្នុរ ក៏អាចជួួយ ការពារ បញ្ហាទល់លាមក ផងដែរ។

ទាំងនេះ ជាអត្ថប្រយោជន៍ របស់ផ្លែខ្នុរ ចំពោះសុខភាព៕

ប្រភព បរទេស

ដោយ៖ កា

ភាពភ្ញាក់ផ្អើលលើឆាកចំណេះដឹងពិភពលោកថ្មីៗ៤ របស់ក្រុមយុវជនឆ្នើមខ្មែរ

ប្រភពមកពី៖ news.sabay.com.kh

ស៊ូ ហ្សូលីដា តែងសេចក្ដីជាប់ Top 10 ពិភពលោក

វាមិនមែនជារឿងយកបានផុយៗទេ សម្រាប់ការក្លាយជា អត្ថបទ ទឹកដៃល្អៗកំពូលទាំង១០ (Top 10) ក្នុងការប្រកួតតែងសេចក្ដីពិភពលោក មានបេក្ខជនសរុបជាង៨០០នាក់ មកពី៣០ប្រទេសជុំវិញពិភពលោកចូលរួម ផ្ដោតលើប្រធានបទ បញ្ហាយុវវ័យប្រឈមចំពោះសុខភាព។ កញ្ញា ស៊ូ ហ្សូលីដា បានបង្កើតការភ្ញាក់ផ្អើលសម្រាប់យុវជនកម្ពុជាទាំងមូល នៅពេលដែលសំណេរតែងសេចក្ដីភាសាអង់គ្លេសរបស់នាងចំណងជើងថា «ការធ្វើទុក្ខបុកម្នេញខាងផ្លូវកាយ និងផ្លូវចិត្ត» ឬជាភាសាអង់គ្លេសថា «Bullying» ត្រូវបានជ្រើសរើសឲ្យជាប់អត្ថបទឆ្នើមទាំង១០ ក្នុងការប្រកួតតែងសេចក្ដីអន្តរជាតិនៃកម្មវិធី Akili Initiative ឆ្នាំ២០១៤នោះ។

ហ្សូលីដា បានការអញ្ជើញទៅចូលរួមសន្និបាតយុវជនពិភពលោកនៅស្ត្រីលង្កាដើម្បីស្ដាប់ការប្រកាសជយលាភី ប៉ុន្តែជាទីបញ្ចប់ជើងឯកបានធ្លាក់លើដៃបេក្ខជនឥណ្ឌា។ «តែ យ៉ាងហោចណាស់ ខ្ញុំអាចជាប់ជាជម្រើស១០នាក់ចុងក្រោយនៅក្នុងកម្មវិធី ហើយបានជួយលើកស្ទួយឲ្យវិស័យអប់រំរបស់កម្ពុជាមានមុខលើឆាក អន្តរជាតិផងដែរ។ ខ្ញុំសង្ឃឹមថាយុវជនខ្មែរជំនាន់ក្រោយអាចមានសមត្ថភាពលើកស្ទួយ ការអប់រំនៅកម្ពុជាឲ្យបានល្បីឈ្មោះផងដែរ»។ កញ្ញា ស៊ូ ហ្សូលីដា រៀបរាប់ជាចុងក្រោយដូច្នេះ។ ហ្សូលីដា អតីតនិស្សិតវិទ្យាស្ថានភាសាបរទេស បញ្ជាក់ក្នុងបទសម្ភាសមក Sabay កន្លងមក។

គម្រោងអាជីវកម្ម Smart Food ឈ្នះពានរង្វាន់ពិភពលោក

ពិភពសហគ្រិនខ្មែរបើកភ្នែកធំៗមិនតិចទេដែល «Smart Food» គម្រោងអាជីវកម្ម សរសេរដោយសិស្សវិទ្យាល័យភ្នំពេញ៨នាក់ និងសិស្សស្រីពីរនាក់មកពី កំពង់ចាម និង បន្ទាយមានជ័យ បានឈ្នះពានដល់ទៅពីរ គឺពាន អាស៊ីប៉ាស៊ីហ្វិក និងពានពិភពលោក ដ៏ធំបំផុតរបស់មជ្ឈមណ្ឌល GEC ឆ្នាំមុននេះ។ ស្នាដៃរបស់យុវជនវិទ្យាល័យខ្មែរ បានវាយផ្ដួលក្រុមគូប្រជែងមកពីប្រទេសជឿនលឿនជាច្រើនទាំងមហាអំណាច អាមេរិក អាល្លឺម៉ង់ ជប៉ុន ម៉ិកស៊ីកូ កាណាដា អូស្ត្រាលី ហ្វីលីពីន ជាដើម ដើម្បីច្បាមយកពានរង្វាន់ជាប្រវត្តិសាស្ត្រសម្រាប់កម្ពុជា។

Smart Food ជាគម្រោងអាជីវកម្ម ដែលដើរតួជាឈ្មួញកណ្ដាល សហការឲ្យ NGO ជំនាញកសិកម្ម ចុះផ្ដល់បច្ចេកទេសនិងបង្រៀនកសិករខ្មែរ ឲ្យដាំដុះបន្លែ និងចិញ្ចឹមសត្វបែបធម្មជាតិទទួលផលខ្ពស់។ ផលបន្លែសាច់ នឹងត្រូវប្រមូលទិញ យកទៅដាក់លក់តាមបច្ចេកទេសទំនើប ដោយរៀបចំជាឈុតៗ រួចជាស្រេច ដួចក្នុងផ្សារទំនើបអីចឹង ផ្ដល់ភាពងាយស្រួលដល់អតិជនគោលដៅដែលពុំមានពេលច្រើន ក្នុងការរកម្ហូបអាហារមានសុវត្ថិភាព។ ប្រាក់ចំណេញ១០% នឹងត្រូវច្រៀកឲ្យ NGO ដើម្បីសកម្មភាពសហការងារនេះ។
បន្លែ សាច់នឹងផ្គត់ផ្គង់អតិថិជនទាំងនៅឆៅស្រស់ និងចម្អិនជូន ដោយមានបរិមាណ៣កម្រិតទៅតាមតម្រូវការ។ ការដាក់លក់ផលិតផល គឺគ្រប់គ្រងទំនើបតាមបែបបច្ចេកវិទ្យាចុងក្រោយព្រោះថា Smart Food មានបំពាក់ Board Code នៅតាមគោលដៅសម្បូរមនុស្ស។ គេអាចបញ្ជាទិញ បន្លែម្ហូប Smart Food នៅគ្រប់កន្លែងមាន Board Code តាមរយៈការប្រើទូរសព្ទ Smartphone ស្ដេនមុខម្ហូបឬឈុតបន្លែសាច់ដែលពេញចិត្ត។

ប៉ែន សុខអានជើងឯកអាស៊ីប៉ាស៊ីហ្វិក

វ័យមិនដល់២០ឆ្នាំឡើយកញ្ញា ប៉ែន សុខអាន ជាជើងឯកថ្នាក់ជាតិនៃការប្រកួតវោហារសព្ទជាសាធារណៈរៀបចំដោយ JCI កម្ពុជា សាខាចតុមុខឆ្នាំទៅមិញ។ សុខអាន បានបន្តទៅកាន់ការប្រកួតថ្នាក់តំបន់នៅ JCI Asia Pacific Conference នៅប្រទេសជប៉ុន និងបានពុះហែកភាពរំជើបរំជួល ដោយក្លាយខ្លួនជាម្ចាស់ពានប្រចាំតំបន់អាស៊ីប៉ាស៊ីហ្វិក ដោយការផ្ដួលតាមរយៈចំណេះដឹងប្រើថ្វីមាត់ លើយុវជនពីប្រទេសផ្សេងៗដូចជា ម្ចាស់ផ្ទះជប៉ុន ម៉ុងហ្គោលី ម៉ាឡេស៊ី ហ្វីលីពីន និង ឥណ្ឌា ជាដើម។ សុខអាន បានក្លាយជាបេក្ខជនម្នាក់ចំណោមដៃគូឆ្នើមៗ៣នាក់ទៀតដែលជាជើងឯកប្រចាំទ្វីប អាមេរិក អឺរ៉ុប និង អាហ្វ្រិក នាការប្រកួតផ្ដាច់ព្រ័ត្រកម្រិតពិភពលោកក្នុង សន្និសីទពិភពលោករបស់ JCI នៅទីក្រុង Leipzig ប្រទេសអាល្លឺម៉ង់កាលចុងឆ្នាំមុន។ ប៉ុន្តែ សុខអាន មិនអាចចាប់យកចំណាត់ថ្នាក់ជើងឯកបានឡើយ ពោលទីបញ្ចប់ Paul Akingbola សញ្ជាតិនីហ្សេរីយ៉ា តំណាងទ្វីបអាហ្វ្រិកបានឈ្នះជើងឯកពិភពលោក។

1795919_1645915598968829_3815325086489416522_o

ប៉ែន សុខអាន ជាមួយដៃគូជើងឯកប្រចាំទ្វីប អាមេរិក អឺរ៉ុប និង អាហ្វ្រិក

គំរូអាជីវកម្មបុណ្យសព

កំពុងបន្តបរិញ្ញាបត្រនៅសាកលវិទ្យាល័យជាតិគ្រប់គ្រងឆ្នាំទី៣ដូចគ្នា ហោ ស៊ីវហុង និង ឡាយ ឈុនយី ក្លាយជាម្ចាស់មេដាយមាសប្រចាំមហាអនុតំបន់ទន្លេមេគង្គជាប្រវត្តិសាស្ត្រ ក្នុងវេទិកាប្រកួតប្រជែង គំរូអាជីវកម្ម Menkong Business Challenge នៅទីក្រុងហាណូយប្រទេសវៀតណាមកាលខែកុម្ភៈ។ សីវហុង និង ឈុនយី នឹងនាំគំរូអាជីវកម្មឆ្នើមខ្លួន ដែលមានឈ្មោះថា «សេវាកម្មបុណ្យសព ឬ RIP Funeral Service Agency »ទៅប្រកួតប្រកួតប្រជែងកម្រិតពិភពលោក International Business Model Competition នៅសាកលវិទ្យាល័យ Brigham Young University រដ្ឋយូតាថ្ងៃទី ១ឧសភាខាងមុខ។ ទីនោះ ក្រុមយុវតីខ្មែរនឹង ប្រកួតប្រជែងជាមួយក្រុមនិស្សិតជាង៥០ក្រុមទៀត មកពីសាកលវិទ្យាល័យល្បីៗតាមប្រទេសផ្សេងៗ មានទាំងសាកលវិទ្យាល័យលំដាប់ពិភពលោក Harvard និង Stanford។

សីវហុង (ឆ្វេង) និង ឈុនយី

អត្ថបទ៖ ប៉ែន សុផាន់ណា

អ្នកជំនាញមហារីក៖ ការប្រើប្រាស់ ថ្នាំវីតាមីន ច្រើនពេក អាចធ្វើឲ្យ កើតជំងឺបេះដូង និង មហារីក

ប្រភពមកពី៖ khmerload

សុខភាព៖ មនុស្សភាគច្រើន បានប្រើប្រាស់ ថ្នាំបំប៉ន និង ថ្នាំគ្រាប់ វីតាមីនផ្សេងៗ ក្នុងការជឿជាក់ថា នឹងអាចជួយជំរុញ ឲ្យមានសុខភាពល្អ ហើយការពាររាងកាយ ប្រឆាំងទប់ទល់ ជំងឺផ្សេងៗ ។

តែយ៉ាងណាមិញ តាមប្រភពព័ត៌មាន បានឲ្យដឹងថា មានការសិក្សាថ្មីមួយ របស់អ្នកជំនាញ ផ្នែកមហារីក បានរកឃើញថា ការប្រើប្រាស់ ថ្នាំវីតាមីន សំរាប់បំប៉នសុខភាព ច្រើនហួសប្រមាណ ជារៀងរាល់ថ្ងៃ លើសពីការណែនាំ អាចផ្តល់ជាផលប៉ះពាល់ ចំពោះសុខភាព ទៅវិញ ហើយ អាចបណ្តាលឲ្យ កើតជំងឺបេះដូង និងមហារីក ទៀតផង។

លោក វេជ្ជបណ្ឌិត Tim Byers ជាគ្រូពេទ្យជំនាញ ផ្នែកព្យាបាលជំងឺ មហារីកម្នាក់ នៅសាកលវិទ្យាល័យ Colorado សហរដ្ឋអាមេរិក ដែលបាន ធ្វើការសិក្សា ស្រាវជ្រាវ អស់រយៈពេល ៣០ឆ្នាំ មកហើយនោះ បានព្រមានថា ការប្រើប្រាស់នូវ ថ្នាំបំប៉ន និង ថ្នាំវីតាមីន ដូចជាវីតាមីន E ជាដើម ក្នុង ចំនួនច្រើនពេក ជារៀងរាល់ថ្ងៃ ហួសពីការណែនាំ អាចនឹងបណ្តាលឲ្យ កើតជំងឺមហារីក។ លោក វេជ្ជបណ្ឌិតរូបនេះ បានបន្តថា “យើងមិន ប្រាកដថា ហេតុអ្វី បានវាកើតឡើង បែបនេះទេ ប៉ុន្តែភស្តុតាង បានបង្ហាញថា មនុស្សដែល ប្រើថ្នាំបំប៉ន ច្រើនហួសកំរិត នឹងអាច ប្រឈម មុខខ្ពស់ នឹងការកើតជំងឺ មហារីក” ។

វេជ្ជបណ្ឌិត Tim បន្តថា ក្នុងរយៈពេល ពីរសតវត្ស កន្លងទៅនេះ ការស្រាវជ្រាវបាន ចង្អុលបង្ហាញថា មនុស្សដែល ពិសា ផ្លែឈើ និងបន្លែ ច្រើន អាចនឹងកាត់បន្ថយ កំរិតនៃការ កើតមហារីក បាន ។ ដូច្នេះ វេជ្ជបណ្ឌិត Tim ក៏ធ្វើការស្រាវជ្រាវ ថាតើ ការប្រើប្រាស់ ថ្នាំគ្រាប់ បំប៉ន ឬ វីតាមីន អាចជួយ កាត់បន្ថយ ការប្រឈម មិនឲ្យ មនុស្សកើតមហារីក បាន ដែរ ឬយ៉ាងណា។

គាត់ប្រាប់ថា ដំបូងឡើយ ក្រុមការងារគាត់ បានធ្វើតេស្ត ថ្នាំ វីតាមីនបំប៉ន ទាំងនោះជាមួយ សត្វ ហើយបានរកឃើញលទ្ធផល ចេញមក ដូចការ ប៉ានស្មានមែន ។ បន្ទាប់មក គាត់បានធ្វើការ សិក្សាតាមដាន មនុស្សរាប់ពាន់នាក់ ដែលបានប្រើប្រាស់ ថ្នាំបំប៉ន និង វីតាមីន ក្នុងរយៈពេល ១០ឆ្នាំ ជាលទ្ធផល គាត់រកឃើញថា វីតាមីន និង ថ្នាំបំប៉ន មិនមានប្រយោជន៍ ទប់ស្កាត់មហារីក នោះទេ ពីព្រោះ មនុស្សមួយចំនួន បានកើត មហារីក នៅពេល ពួកគេកំពុង ប្រើថ្នាំបំប៉ន និង វីតាមីន។

ក្នុងនោះ វេជ្ជបណ្ឌិតរូបនេះ បានលើកយក ឧទាហរណ៍ឲ្យឃើញ អំពីឥទ្ធិពលរបស់ ថ្នាំបំប៉ន បេតាការ៉ូតែន (beta-carotene) ដែលជាប្រភេទថ្នាំ ដែលជួយដល់ សុខភាពភ្នែក និងរាងកាយ មកបង្ហាញថា ការប្រើប្រាស់ថ្នាំនេះ លើសពីចំនួនកំណត់ អាចប្រឈមមុខ នឹងជំងឺ មហារីកសួត និង បេះដូង ក្នុងកំរិត ២០ភាគរយ ។

ប៉ុន្តែ ទោះបីជាយ៉ាងណា វេជ្ជបណ្ឌិត រូបនេះ បង្ហាញថា ការរកឃើញនេះ មិនមែនឲ្យ មនុស្ស ភ័យខ្លាចឈប់ ប្រើប្រាស់ ថ្នាំបំប៉ន និងវីតាមីន នោះទេ ប៉ុន្តែ គាត់ណែនាំ ឲ្យ មនុស្សគ្រប់គ្នា ត្រូវប្រើប្រាស់ ថ្នាំបំប៉ន និង វីតាមីន ក្នុងកម្រិតត្រឹមត្រូវ ដែលបានណែនាំ ពីគ្រូពេទ្យជំនាញ។ គាត់ និង អ្នកជំនាញដទៃ ក៏បានណែនាំ ថា ការពិសា អាហារ បែបធម្មជាតិ និងរបបអាហារ ត្រឹមត្រូវ ជាជម្រើសល្អ តែមួយគត់ ដើម្បីទទួលបាន សុខភាពល្អ ។

គួរបញ្ជាក់ដែរថា ការសិក្សា ដែលបានរកឃើញថ្មីនេះ ក៏ត្រូវបានលើកយក ទៅបង្ហាញ ក្នុងកិច្ចប្រជុំ ប្រចាំឆ្នាំរបស់ សហគមក្រុមស្រាវជ្រាវ ជំងឺ មហារីក អាមេរិក ប្រចាំឆ្នាំ ២០១៥ ផងដែរ ៕

ប្រភេទថ្នាំគ្រាប់វីតាមីន ផ្សេងៗ

ការពិសា អាហារ បែបធម្មជាតិ និងរបបអាហារ ត្រឹមត្រូវ ជាជម្រើសល្អ សំរាប់សុខភាពល្អ

ប្រភព Dailymail | Mirror

បកប្រែដោយ៖ ទីន

Tuesday, April 21, 2015

គូដណ្តឹងស្រវឹងកើត ភ្លើងប្រចណ្ឌ ចាប់នាងអារ.ក នឹងផ្លែឡាម ក្នុងបន្ទប់ទឹក

ប្រភពមកពី៖ khmerload

ខេត្តកំពង់ឆ្នាំង ៖ យុវជនម្នាក់ត្រូវបាន កម្លាំងនគរបាលការិយាល័យ ព្រហ្មទណ្ឌកម្រិតធ្ងន់ នៃស្នងការ ដ្ឋាននគរបាលខេត្ត ឃាត់ខ្លួនបន្ទាប់ ពីធ្វើសកម្មភាព ចាប់ក្រៀកនារី ជាគូដណ្តឹង រួចយកផ្លែឡាម អារ.ក នាងបណ្តាលឱ្យ រងរបួស ជាច្រើនកន្លែង ។ ហេតុការណ៍ផ្តើម ចេញពី ភ្លើងប្រចណ្ឌនេះ កើតឡើងកាល ពីវេលាម៉ោង ៧និង៣០នាទី យប់ ថ្ងៃទី១១ មេសា នៅភូមិដំណាក់ព្រីង ឃុំស្វាយជុក ស្រុកសាមគ្គីមាន ជ័យ ។

យោង តាមរបាយការណ៍ របស់នគរបាលខេត្ត ដែលបានរាយការណ៍ ទៅលោកព្រះរាជអាជ្ញាអមសាលា ដំបូងខេត្ត ឱ្យដឹងថា ជនសង្ស័យ ឈ្មោះ ឯល ម៉ឹក អាយុ២១ឆ្នាំ មានទីលំនៅ ក្នុងភូមិឃុំ កើតហេតុខាងលើ ចំណែកនាង ជាគូដណ្តឹងឈ្មោះ សាន់ ម៉ាស់ អាយុ២២ឆ្នាំ ទាំងពីរ នាក់ជា ខ្មែរអ៊ិស្លាម រស់នៅភូមិឃុំ ជាមួយគ្នា ។ មុនពេលកើតហេតុ ជនសង្ស័យបាន ផឹកស្រាស្រវឹង ហើយបានទៅផ្ទះនារី ដែលជាគូដណ្តឹង ។ ពេលទៅដល់ បានជួបនាង ហើយពេលនិយាយ ទៅកាន់នាងដោយ មានធុំក្លិនស្រា នាងស្រែកថា ស្អប់ណាស់អ្នកផឹកស្រា រួចនាងបាន គេចឡើងទៅ លើផ្ទះបាត់ទៅ ។ បន្ទាប់មក ជនសង្ស័យបាន ត្រឡប់មកផ្ទះវិញ ប្រហែលកន្លះម៉ោង ក្រោយមកក៏ ត្រឡប់ទៅផ្ទះ នាងគូ ដណ្តឹង ម្តងទៀត ឃើញនាងចូល បន្ទប់ទឹក ក៏ដើរតាម ពីក្រោយ និងចាប់ក្រៀក នាងជាប់ហើយ សម្លុតសួរថា «ស្រឡាញ់ខ្ញុំឬអត់» ? នាងឆ្លើយថា «អញអត់ស្រឡាញ់ទេ អាអ្នកផឹកស្រា» ពេលនោះ ជនសង្ស័យ ក៏ចាប់នាង អារ.ក នឹងផ្លែឡាមបណ្តាល ឱ្យរងរបួស។ ព្រម ពេល ជាមួយគ្នានោះ នារីរងគ្រោះ បានស្រែកឱ្យ ឪពុកម្តាយនាងជួយ ខណៈដែលម្តាយ នាងរត់ទៅដល់ ជនសង្ស័យ បានរត់គេចខ្លួន បាត់ ទៅហើយ តែក្រោយមក ត្រូវចាប់ខ្លួនបន្ទាប់ ពីមានបណ្តឹងពីអ្នក អាណាព្យាបាល ជន រងគ្រោះ ។

នៅចំពោះមុខសមត្ថកិច្ច ជនសង្ស័យសារភាពថា ខ្លួនពិតជាបានអារ.កនាងនឹងផ្លែឡាមមែន ព្រោះ សង្ស័យថា នាងមានប្រុសថ្មី និងខឹងនាង ពេលចាប់សួរ នាងស្រែកថា «អាឆ្កែអញអត់ ស្រឡាញ់អ្ហែងទេ» ទើបរូបគេទប់ កំហឹងមិនបាន ។

ទោះ យ៉ាងណាក្តី នៅឯមន្ទីរពេទ្យខេត្ត ម្តាយនារីរងគ្រោះ ហាក់ទទួលនូវ គំនាបអ្វីមួយ ឬ អាចថា ប្រហែល ជាបានទទួល សំណងណាមួយ ពីគ្រួសារជនសង្ស័យ ទើបស្នើសុំ ឱ្យនគរបាលជួយ កុំយកទោសទណ្ឌអ្វី តែសមត្ថកិច្ចប្រាប់ថា នេះជាអំពើហិង្សា ដោយចេតនា មានស្ថាន ទម្ងន់ទោស ត្រូវកសាងសំណុំ រឿងបញ្ជូនទៅ សាលាដំបូងចាត់ការ តាមផ្លូវច្បាប់ ៕

ផ្តល់សិទ្ធដោយ កោះសន្តិភាព

ម៉ូតូ ឡាន រំលោភគន្លងផ្លូវគ្នាគ្មានមេត្តា រឹតកកស្ទះចរាចរណ៍ខ្លាំងឡើង

ប្រភពមកពី៖ news.sabay.com.kh

គន្លងផ្លូវ សំដៅដល់ចំណែកមួយនៃទ្រូងផ្លូវខណ្ឌដោយគំនូស ឬបរិក្ខារបែងចំណែកផ្លូវ តាមបណ្ដោយទ្រូងផ្លូវដែលមានទទឹងគ្រប់គ្រាន់អាចឲ្យយានជំនិះគ្រប់ប្រភេទធ្វើដំណើរបានមួយជួរ។ តែសព្វថ្ងៃបើគេក្រឡេកមើលឡាន ម៉ូតូលើដងផ្លូវវិញ គឺមិនបានគោរពត្រឹមត្រូវឡើយ គឺចរាចរណ៍បំពានគន្លងគ្នាទៅវិញទៅមក។

ប្រជាជនភាគច្រើនរអ៊ូថា ជួនកាលគេឃើញម៉ូតូជិះក្នុងគន្លងផ្លូវឡានក៏មាន។ ហើយឡានវិញ ពេលខ្លះជិះដល់ទៅបីឬបួនជួរ អត់មានផ្លូវសល់សម្រាប់ម៉ូតូឬកង់ជិះឡើយ រហូតដល់ពួកគាត់បែរជាត្រូវទៅជិះលើចិញ្ចើមផ្លូវឬខឿនមុខផ្ទះគេទៅវិញ ធ្វើឲ្យរឹតតែស្ទះ គ្មានសណ្ដាប់ធ្នាប់ និង គ្រោះថ្នាក់ចរាចរណ៍ថែមទៀត។

ជួបជាមួយអ្នកស្រី រ័ត្ន គ្រូបង្រៀននៅវិទ្យាល័យទួលទំពូង ប្រាប់ថា រាល់ថ្ងៃពេលជិះម៉ូតូទៅបង្រៀនម្ដងៗ អ្នកស្រីតឹងចិត្តផង ខឹងផង រឿងឡានម៉ូតូជិះដណ្ដើមផ្លូវគ្នា គ្មានគន្លងច្បាស់លាស់។

អ្នកស្រីបន្តថា ជិះសព្វថ្ងៃ គឺប្រយ័ត្នណាស់ ព្រោះពេលជិះខាងផ្លូវម៉ូតូ តែជួនកាលអាចមានឡានចូលមក ជិះប៊ិះឆាបម៉ូតូអ្នកស្រីទៀតក៏មាន ព្រោះឥលូវចំណីផ្លូវម៉ូតូក៏ឡានជិះដែរ។ ជាទូទៅផ្លូវមួយគេបែងចែកគន្លងឡាននិងម៉ូតូ តែឡានខ្លះឲ្យតែមានចន្លោះផ្លូវទំនេរនៅសល់ដឹងតែប្រជ្រៀតជិះតែម្ដង មិនគិតពីគំនូសអាទិភាពថាជារបស់ម៉ូតូអីឡើយ ដែលពេលខ្លះពេញមួយផ្លូវមានតែឡានជិះ ហើយម៉ូតូទៅជាជិះលើខឿនចិញ្ចើមថ្នល់ទៅវិញ ធ្វើឲ្យរឹតស្ទះកាន់តែខ្លាំង។

ងាកមកនិស្សិតឆ្នាំទីមួយ ជំនាញអក្សរសាស្ត្រអង់គ្លេស ប៉ែន សុភីយ៉ា និយាយថា ករណីបែបនេះភាគច្រើននៅរាជធានីភ្នំពេញ តែងឃើញនៅពេលព្រឹកនិង ល្ងាច ស្ទើរមិនដែលខានទេ។ ពេលខ្លះមិនត្រឹមតែឡានបើកចូលគន្លងផ្លូវម៉ូតូជាពីរបីជួរទេ សូម្បីម៉ូតូក៏ចូលគន្លងឡានដូចគ្នា។ ទាំងឡាន និង ម៉ូតូ ជិះប្រសាចពេញផ្លូវមិនគិតគន្លងមួយណាទេ ឲ្យតែទំនេរជ្រៀតបាន គឺបើកចូលទាំងអស់ ដែលពេលខ្លះទៅបុកអ្នកថ្មើរជើងទៀតក៏មាន។

និស្សិតរៀននៅសាកលវិទ្យាល័យបញ្ញាសាស្ត្ររូបនេះ បញ្ចេញមតិថា ពួកគាត់ធ្វើបែបនេះដោយសារតែស្ទះផ្លូវពេក មិនចង់រង់ចាំយូរ ម្ល៉ោះហើយគាត់ចង់ទៅមុន ក៏ចេះតែប្រជៀតគ្រប់តែផ្លូវឲ្យតែទៅមុខបាន ដោយមិនបានគិតពីអ្នកផ្សេងៗ ។ តែភីយ៉ាថា ការធ្វើបែបនេះមិនបានជួយឬចំណេញពេលវេលាគាត់ឡើយ ផ្ទុយទៅវិញរឹតតែស្ទះខ្លាំងជាងមុន ឬអាចឲ្យមានគ្រោះថ្នាក់ចរាចរណ៍ថែមទៀត ហើយស្រួលមិនស្រួលអ្នកជិះក្បែរនោះគេស្អប់ គេមើលងាយលើសដើម។

លោក ពៅ ម៉ាលី អគ្គលេខាធិការរងគណៈកម្មាធិការជាតិសុវត្ថិភាពចរាចរណ៍ផ្លូវគោក បានប្រាប់ Sabay ថា លោកតែងប្រទះឃើញករណីបែបនេះកើតឡើងជាញឹកញយពិសេសនៅភ្នំពេញតែម្ដង តាមរយៈបណ្ដាញសង្គម និង ផ្ទាល់ភ្នែក ហើយសូម្បីលោកផ្ទាល់ក៏ធ្លាប់រងគ្រោះដោយសារគេជិះខុសគន្លងមកប៉ះពារលោកដែរ។

អគ្គលេខាធិការរងគណៈកម្មាធិការជាតិសុវត្ថិភាពចរាចរណ៍ផ្លូវគោកបន្ថែមថា កន្លងមក ខាងលោកតែងតែចុះផ្សព្វផ្សាយ និងចុះបង្រៀននៅតាមបណ្ដាខេត្តពីច្បាប់ចរាចរណ៍ផ្លូវគោកជាហូរហែ ប៉ុន្តែ ទង្វើទាំងអស់នេះ នៅតែកើតឡើង ដោយសារខ្វះការយោគយល់ និង មិនគោរពច្បាប់ចរាចរណ៍ ។ ជួនកាលពួកគាត់បានដឹងរួចហើយថាបើកបរបែបនេះមិនត្រឹមត្រូវ តែពួកគាត់នៅតែបំពាន។

យោងតាមមាត្រា ១០ នៃច្បាប់ចរាចរណ៍ផ្លូវគោកថ្មី ចែងថា នៅលើគន្លងផ្លូវតម្រូវសម្រាប់យានជំនិះប្រភេទណាមួយ អ្នកបើកបរយានជំនិះប្រភេទដទៃ មិនត្រូវបើកចូលគន្លងនេះទេ លើកលែងតែត្រូវចាកចេញ ឬចូលទៅក្នុងគន្លងផ្លូវរបស់ខ្លួន។

សូមអាន៖ ចិញ្ចើមថ្នល់ក្លាយជាកន្លែងត្រូវប៉ាន់របស់អ្នកលក់ចំណីពេលយប់

សូមអាន៖ គំនិតដ៏សាមញ្ញតែសំខាន់ជួយអ្នកជៀសពីការកកស្ទះចរាចរណ៍

អត្ថបទ៖ លឹម សុនា

IT មានច្រើនជំនាញសិក្សា តិចឬច្រើនអ្នកសិក្សាមួយចំនួនអាចមិនទាន់ដឹង

ប្រភពមកពី៖ news.sabay.com.kh

ប្រិយមិត្តមួយចំនួនគ្រាន់តែដឹងថាពាក្យថា IT សំដៅទៅលើផ្នែកបច្ចេកវិទ្យា និងកុំព្យូទ័រ តែមិនបានដឹងទេថាតើ IT នេះមានពាក្យពេញបែបណាហើយចែកចេញជាប៉ុន្មានផ្នែកនោះទេ។ IT មកពីពាក្យពេញថា Information Technology ហើយវាមានមុខវិជ្ជាគោល៥ធំៗដែលក្នុងនោះមានដូចជា Network Engineering (គ្រប់គ្រងបណ្ដាញ Network) Software Development (ការបង្កើតកម្មវិធី) Web Design (រចនាគេហទំព័រ) IT Management (ការគ្រប់គ្រងមុខជំនួញIT) និង Database Management (គ្រប់គ្រងទិន្នន័យ)។ នេះជាការរៀបរាប់របស់លោក កៀន តាក់ សាស្ត្រាចារ្យប្រចាំសាកលវិទ្យាល័យភូមិន្ទភ្នំពេញ។

មុខវិជ្ជា Network Engineering គឺផ្តោតសំខាន់ទៅលើមេរៀនដែលពាក់ព័ន្ធទៅនឹងការតបណ្ដាញNetwork និងការកំណត់ប្រព័ន្ធសុវត្ថិភាពទៅលើបណ្ដាញនោះ។ ចំណែកឯ Software Developmentគឺសិក្សាអំពីការសរសេរកម្មវិធីដោយប្រើប្រាស់ភាសា C# និង C++ ជាដើម ដែលវាអាចប្រើសម្រាប់សរសេរកម្មវិធីទូរសព្ទផងនិងកម្មវិធីកុំព្យូទ័រផង។

ដោយឡែក Web Design គឺនិយាយពីការបង្កើតនិងរចនាគេហទំព័រដោយប្រើភាសា HTML និង PHP ជាដើម។ IT Managementគឺការគ្រប់គ្រងមុខជំនួញដោយប្រើប្រាស់ប្រព័ន្ធ ITផ្ទាល់ហើយមុខវិជ្ជានេះគឺល្អសម្រាប់និស្សិតណាមានគំនិតដែលប្រកបដោយយុទ្ធសាស្ត្រ។ ចំពោះDatabase Management គឺបង្រៀនពីការគ្រប់គ្រងព័ត៌មានរបស់ទិន្នន័យណាមួយអោយមានភាពងាយស្រួលនិងមានរបៀបរៀបរយគួបផ្សំនិងសុវត្ថិភាពផងដែរ។

លោកបានបន្ថែមទៀតថា ចាប់ពីឆ្នាំទី១ដល់ឆ្នាំទី៤ការសិក្សាមានលក្ខណៈច្របល់ចូលគ្នាទាំងអស់ ដោយឡែកប្រសិនបើសិស្សម្នាក់ណាពេញចិត្តនឹងមុខវិជ្ជាណាមួយគេអាចផ្ដោតសំខាន់ទៅលើមុខវិជ្ជានោះបាន ធ្វើយ៉ាងណាកុំឲ្យតែធ្លាក់មុខវិជ្ជាដទៃទៀតទៅបានហើយ។

សម្រាប់មុខវិជ្ជាសិក្សា សាស្រ្តាចារ្យរូបនេះប្រាប់ថាអាចខុសគ្នាអាស្រ័យតាមប្រព័ន្ធសិក្សារបស់សាលានីមួយៗ។

អត្ថបទ៖ហៃ សុខហេង

Monday, April 20, 2015

គួរដឹង! ភាពស្គមស្គាំង ក្នុងវ័យកណ្តាល អាចឲ្យអ្នក ប្រឈមមុខ នឹងជំងឺឆ្កួត រវើរវាយបាន

ប្រភពមកពី៖ khmerload

អង់គ្លេស៖ កាលពីពេលថ្មីៗនេះ ក្រុមអ្នកវិទ្យាសាស្ត្រ បានបញ្ចេញ របាយការណ៍ថ្មី មួយទៀត ទាក់ទងទៅនឹង មនុស្សក្នុងវ័យកណ្តាល មួយចំនួន អាចប្រឈមមុខ ខ្ពស់នឹងជំងឺ ឆ្កួតរវើរវាយ ប្រសិនណាបើ ពួកគេមានភាព ស្គមស្គាំងជ្រុលពេក។

យោងតាមប្រភព របាយការណ៍របស់ ក្រុមអ្នកវិទ្យាសាស្ត្រ នៃសាលាសុខវិទ្យា និងវេជ្ជសាស្ត្រ ក្នុងទីក្រុង ឡុងដ៍ របស់ប្រទេស អង់គ្លេស បានឲ្យដឹងថា នៅពេលដែល មនុស្សឈានចូលដល់ វ័យកណ្តាល ហើយពួកគេ មានទម្ងន់ដែល ស្រាលជ្រុល និងមានភាព ស្គមស្គាំង នោះនឹងអាច ធ្វើឲ្យពួកគេ ប្រឈមមុខ នឹងជំងឺជាច្រើន ដូចជា ជំងឺឆ្កួត រវើរវាយ, ជំងឺភ្លេចភ្លាំង ច្រើនជាង អ្នកដែលមាន ទម្ងន់ធម្មតា ឬអ្នកដែល លើសទម្ងន់ ទៅទៀត។

របាយការណ៍នេះ មានឡើងបន្ទាប់ ពីមានការស្រាវជ្រាវ និងតាមដាន រយៈពេល៩ឆ្នាំ ទៅលើ មនុស្សចំនួន ១,៩៥៨,១៩១នាក់ ដែលមានវ័យកណ្តាល គឺអាយុចាប់ពី ៤០ទៅដល់ ៦៥ឆ្នាំ ហើយក្នុងនោះ មាន២៦.៥% គឺជាអ្នកដែល លើសទម្ងន់ ឬក៏មាន ភាពធាត់ លើសកម្រិត។ ក្រោយមកក្រុម អ្នកវិទ្យាសាស្ត្រ បានប្រទះឃើញថា មានមនុស្សចំនួន ៤៥,៥០៧នាក់ ត្រូវបានគេ រកឃើញថាមាន កើតជំងឺឆ្កួត រវើរវាយ ដែលក្នុងនោះ ភាគច្រើនគឺជា អ្នកដែលមាន ភាពស្គមស្គាំង ឬមានទម្ងន់ ស្រាលជ្រុល។

ភាពស្គមជ្រុល សម្រាប់មនុស្ស ក្នុងវ័យកណ្តាល អាចធ្វើឲ្យ ពួកគេមានជំងឺ ឆ្កួតរវើរវាយ

លោកសាស្ត្រាចារ្យ Stuart Pocock អ្នកដឹកនាំ ក្នុងការស្រាវជ្រាវ នេះបាននិយាយថា “លទ្ធផលនៃ ការស្រាវជ្រាវ របស់ពួកយើង គឺអាចធ្វើការ ក្រើនរំឭកសាជាថ្មី ព្រោះថានាពេល កន្លងមក មានការយល់ថា ភាគច្រើនមនុស្ស ក្នុងវ័យកណ្តាល ដែលមានភាព ធាត់ជ្រុល ឬក៏លើសទម្ងន់ គឺអាចប្រឈមមុខ ខ្ពស់ជាមួយនឹង ជំងឺផ្សេងៗ ក្នុងនោះ ក៏មានជំងឺ ភ្លេចភ្លាំង និងឆ្កួតរវើរវាយ ផងដែរ។ ដូច្នេះហើយ ទាមទារឲ្យ មានការប្រុងប្រយ័ត្ន សាជាថ្មីទាក់ទង ទៅនឹងទម្ងន់ របស់មនុស្ស ក្នុងវ័យកណ្តាលនេះ”។

គួរបញ្ជាក់ផងដែរថា ការស្រាវជ្រាវ ជាច្រើនរបស់ ក្រុមអ្នកវិទ្យាសាស្ត្រ កន្លងមក គឺចង់បង្ហាញឲ្យ ឃើញថា ការទទួលទាន អាហារដែល មានសុខភាពល្អ និងតុល្យភាព ព្រមទាំង ហាត់ប្រាណ ជាប្រចាំ និងមិនជក់បារី ជាដើមនោះ គឺជារឿងដ៏ សំខាន់បំផុតមួយ សម្រាប់មនុស្ស ពេលដែលពួកគេ ឈានចូលវ័យកណ្តាល ព្រោះថាកត្តាទាំងនេះ អាចឲ្យពួកគេ តាមដានដឹង និងរក្សា ទម្ងន់ក៏ដូចជា សុខភាព របស់ខ្លួន បានយ៉ាងល្អប្រសើរ៕

ការថែរក្សា ទម្ងន់និង សុខភាព ឲ្យបានល្អ គឺជារឿង ដ៏សំខាន់សម្រាប់ មនុស្សក្នុង វ័យកណ្តាល

ប្រភព៖ ដេលីម៉េល

ដោយ៖ Xeno

Wednesday, April 8, 2015

ត្រៀមរថយន្តហែម្ចាស់មេដាយមាសពិភពលោក នៅទីក្រុងភ្នំពេញ រសៀលនេះ

ប្រភពមកពី៖ sabay.com

រថយន្តសម្រាប់ដឹកម្ចាស់មេដាយមាសពិភពលោក គឺកីឡាការិនី កែ ឡេង របស់កម្ពុជា ក្នុងព្រឹត្តិការណ៍កីឡា Women’s Pétanque World Championships 2013 នៅរសៀលថ្ងៃទី៩ ខែ មេសា បានរៀបចំរួចរាល់ហើយ ដែលកំពុងចតចាំនៅបរិវេណពហុកីឡដ្ឋានជាតិ។

រថយន្តត្រៀមហែកីឡាការិនី កែ ឡេង នៅរសៀលនេះ

សម្ដេចនាយករដ្ឋមន្រ្តី ហ៊ុន សែន នឹងបំពាក់គ្រឿងឥស្សរិយយស ព្រះរាជាណាចក្រកម្ពុជាថ្នាក់មហាសេរីវឌ្ឍន៍ ដល់កីឡាការិនី កែ ឡេង នៅរសៀលថ្ងៃទី ៩ ខែ មេសា នេះ មុនរៀបចំហែបង្ហាញមុខដល់មហាជនតាមដងផ្លូវសំខាន់ៗ ក្នុងរាជធានីភ្នំពេញ អមដោយម៉ូតូនគរបាល ១២គ្រឿង បើកផ្លូវ។

យោងតាមសេចក្ដីជូនដំណឹងរបស់គណៈកម្មាធិការជាតិអូឡាំពិកកម្ពុជា ក្រសួងអប់រំយុវជននិងកីឡា និង សហព័ន្ធកីឡាប៊ូលនិងប៉េតង់កម្ពុជា ក្បួនដង្ហែនឹងចេញដំណើរពីវិមានសន្តិភាពឆ្ពោះទៅសាកលវិទ្យាល័យជាតិគ្រប់គ្រង“NUM”រួចឆ្ពោះទៅព័ទ្ធវត្តភ្នំមួយជុំរួចឆ្ពោះទៅតាមមហាវិថីនរោត្តមសំដៅទៅវិមានឯករាជ្យ បន្តបត់ទៅខាងកើតតាមផ្លូវព្រះសីហនុ ដល់ផ្លូវសុធារស បត់ត្រឡប់វិញតាមផ្លូវ ព្រះសុរាម្រឹត ឆ្ពោះមកដល់ស្តុបពេទ្យចិន បត់ស្តាំទៅតាមមហាវិថីមុនីវង្ស រួចបត់ឆ្វេងស្តុប BS (ផ្សាថ្មីជ្រុងផ្លូវកម្ពុជាក្រោម) ចូលផ្លូវកម្ពុជាក្រោម មកបត់ត្រង់ស្តុបដេអិន (បណ្ណាគារ IBC) មករង្វង់មូលអាងទឹកអូឡាំពិក រួចចូលពហុកីឡាដ្ឋានជាតិ។

កីឡាការិនី កែ ឡេង ពេលដណ្ដើមបានមេដាយមាស នៅមីយ៉ាន់ម៉ា (រូបថត៖ Kem Sovanna)

ឯកឧត្តម ថោង ខុន ប្រធានគណៈកម្មាធិការជាតិអូឡាំពិកកម្ពុជា និង ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំយុវជននិងកីឡា នឹងចូលរួមដង្ហែកីឡាការិនី កែ ឡេង នៅរសៀលនេះផងដែរ។

ឧបនាយករដ្ឋមន្រ្តី សុខ អាន ជាប្រធានកីឡាប៊ូលនិងប៉េតង់កម្ពុជា ធ្លាប់លើកឡើងថា៖ «មិនមែនជារឿងងាយទេ ដែលកីឡាការិនី កែ ឡេង ធ្វើឱ្យពិភពលោកបានស្គាល់ប្រទេសកម្ពុជា កាន់តែច្បាស់តាមរយៈកីឡាប៉េតង់។ យើងត្រូវរៀបចំការហែនេះឱ្យសមនឹងសមិទ្ធផលរបស់គាត់»។

ដំណើរក្នុងការឈ្នះមេដាយពិភពលោករបស់កីឡាការិនី កែ ឡេង៖

ព្រឹត្តិការណ៍កីឡាប៉េតង់លំដាប់ពិភពលោកសម្រាប់ស្រ្ដី Women’s Pétanque World Championships 2013 រៀបចំនៅទីក្រុង Montauban ប្រទេសបារាំង ចាប់ពីថ្ងៃទី ៤ ដល់ ៦ តុលា ឆ្នាំ ២០១៣ ដោយ មានវិញ្ញាសាប្រកួតចំនួន ២ គឺវិញ្ញាសាសាវាយយកពិន្ទុ និង វិញ្ញាសា វាយក្រុម៣នាក់។ ជាលទ្ធផលកីឡាការិនីកម្ពុជាដណ្ដើមបានមេដាយមាសក្នុងវិញ្ញាសាវាយយកពិន្ទុ និង មេដាយសំរឹទ្ធក្នុងវិញ្ញាសា វាយក្រុម៣នាក់។

កីឡាការិនី កែ ឡេង ជើងខ្លាំងខាងកីឡាប៉េតង់របស់កម្ពុជា បានចេញមុខប្រកួតក្នុងវិញ្ញាសាវាយយកពិន្ទុ រហូតដណ្ដើមបានមេដាយមាស។ ជំហានដំបូងកីឡាការិនី កែ ឡេង បានប្រកួតវាយសន្សំពិន្ទុជាប់ចំណាត់ថ្នាក់លេខ ៦ ខណៈគណៈកម្មាធិការប្រកួតជ្រើសយក ១៦ នាក់ឡើងទៅប្រកួតវគ្គ ១ / ៨។ ចំណែកឯកីឡាការិនីជាប់ចំណាត់ថ្នាក់ពីលេខ ១៧ ដល់ ៤៣ ត្រូវប្រកួតគ្នាដណ្ដើមពានចំណាត់ថ្នាក់ទី២ គឺ Coupe De Nations ឬ Nation Cup។

វគ្គពាក់ ៨ នាក់ចុងក្រោយ កែ ឡេង របស់កម្ពុជាបានផ្ដួល កីឡាការិនី Simona Bagala របស់អ៊ីតាលី ដើម្បីយកកៅអីឡើងទៅវគ្គពាក់កណ្ដាលផ្ដាច់ព្រ័ត្រ។ ចូលដល់វគ្គ ១/២ ផ្ដាច់ព្រ័ត្រកីឡាការិនីរបស់កម្ពុជានៅតែបង្ហាញភាពខ្លាំងរបស់ខ្លួនដោយយកឈ្នះកីឡាការិនី Josepha Randriamiandrisoa របស់ប្រទេស Madagascar មកពីទ្វីបអាហ្វ្រិក។ នៅវគ្គផ្តាច់ព្រ័ត្រ កីឡាកែ ឡេង បំបាក់កីឡាការិនី Mouna Baji របស់ប្រទេសទុយណេស៊ីក្នុងលទ្ធផល ៣៨ ពិន្ទុ ទល់នឹង ២៧ ដើម្បក្រសោបបានមេដាយមាសពិភពលោកជួនជាតិ។

Womens-Pétanque-World-Championships-2013

កែ ឡេង ពេលឈ្នះមេដាយមាស នៅបារំាង

សរុបលទ្ធផលវិញ្ញាសានេះ កែ ឡេង របស់កម្ពុជាឈ្នះមេដាយមាស ខណៈមេដាយប្រាក់បានទៅ កីឡាការិនី Mouna Baji របស់ទុយណេស៊ី។ មេដាយសំរឹទ្ធស្ទួនបានទៅ កីឡាការិនី Randriamiandrisoa របស់ប្រទេស Madagascar និង កីឡាការិនី Muriel Hess របស់អាល្លឺម៉ង់។

ចំពោះវិញ្ញាសាវាយក្រុម៣នាក់ ក្រុមកីឡាការិនីកម្ពុជាមានឱកាសឡើងដល់វគ្គពាក់កណ្ដាលផ្ដាច់ព្រ័ត្រតែបែរជាភ្លាត់នៅក្រោមថ្វីដៃជម្រើសជាតិថៃ ក្នុងលទ្ធផល ១៣ ពិន្ទុ ទល់ ៧ ពិន្ទុ។ ដូច្នេះកម្ពុជា និង កាណាដា ឈរនៅលេខ ៣ ស្ទួន ទទួលបានមេដាយសំរឹទ្ធ ខណៈថៃ ដណ្ដើមបានមេដាយមាស។ ចំណែកម្ចាស់ផ្ទះ បារាំង ខកចិត្តបានត្រឹមមេដាយប្រាក់៕

អត្ថបទ៖ ម៉ឺន រស្មី

រូបថត៖ FB

អុជធូបប៉ុន្មានសរសៃដើម្បីឲ្យត្រូវក្បួនពេលទទួលទេវតាឆ្នាំថ្មី?

ប្រភពមកពី៖ sabay

ជារៀងរាល់បុណ្យចូលឆ្នាំថ្មីប្រពៃណីជាតិខ្មែរ ប្រជាជនខ្មែរតែងតែមានទំនៀមទម្លាប់អុជធូបទទួលទេវតាឆ្នាំថ្មី និងបន់ស្រន់សុំសេចក្ដីសុខចម្រើន ប៉ុន្តែយុវវ័យខ្លះបែរជាងឿងឆ្ងល់ថាមិនដឹងត្រូវអុជធូបប៉ុន្មានសរសៃឲ្យត្រឹមត្រូវឡើយ គឺដឹងតែអុជតាមតែចិត្ត។

«ខ្ញុំពុំសូវដឹងច្បាស់ពីការអុជធូបហ្នឹងដែរ ប៉ុន្តែពេលចូលឆ្នាំគឺអុជដើម្បីអបអរសាទរទេវតាឆ្នាំថ្នី»។ នេះជាការលើកឡើងរបស់យុវជន ធារិទ្ធិ និស្សិតឆ្នាំទី៤ នៃសាកលវិទ្យាល័យន័រតុន។

ងាកទៅកញ្ញា វ៉ាន់ណេង និស្សិតឆ្នាំទី១នៃសាកលវិទ្យាល័យអាស៊ី អឺរ៉ុបក៏បានលើកឡើងស្រដៀងគ្នាដែរថា៖ «”ចូលឆ្នាំថ្មី គឺខ្ញុំអុជធូបទទួលទេវតាឆ្នាំថ្មី គឺមិនដឹងច្បាស់ពីទំនៀមទម្លាប់នៃការអុជធូបនេះទាល់តែសោះ»។

ដើម្បីស្រាយចម្ងល់នេះភិក្ខុសង្ឃ អួង សុខអេង គង់នៅវត្តមហាមន្រ្តីមានសង្ឃដីកាថា ការអុជធូប ទទួលទេវតា មិនប្រកាន់ថាត្រូវអុជប៉ុន្មានសរសៃនោះទេ។ ប៉ុន្តែតេជគុណមានដីកាថាការអុជធូបគឺអាស្រ័យលើការឧទ្ទិសរបស់អ្នកបន់ស្រន់ ដូចអុជធូបបីសរសៃសំដៅលើ ការឧទ្ទិសដល់ព្រះពុទ្ធ ព្រះធម៌ និងព្រះសង្ឃ។ ចំណែកអុជធូប៥សរសៃឧទ្ទិសដល់ព្រះពុទ្ធរូប៥ ព្រះអង្គ ឬឋានទាំង៥។ ឯអុជប្រាំពីរសរសៃវិញ គឺឧទ្ទិសដល់ញាតិកាប្រាំពីរសន្តាន។

លោក អ៉ឹម បូរិន មន្ត្រីទទួលបន្ទុកផ្នែករៀបចំបុណ្យជាតិនិងអន្តរជាតិ ក៏ស្រាយបំភ្លឺមិនខុសពីតេជគុណ អួង សុខអេង ដែរ។ លោកថា ការអុជធូបទទួលទេវតាឆ្នាំថ្មី គឺមិនបានកំណត់ថាមានចំនួនធូបប៉ុន្មានសរសៃនោះឡើយ។ លោកថាក្បូនអុជ គេអាចអុជ១សរសៃដល់៩សរសៃ។ ប៉ុន្តែអ្វីដែលសំខាន់គឺការឧទ្ទិសបន់ស្រន់ សុំសុខចម្រើនប៉ុណ្ណោះ។ លោកពន្យល់ថាថាធូប៣សរសៃគឺឧទ្ទិសដល់ព្រះពុទ្ធ ព្រះធម៌ និងព្រះសង្ឃ។៥សរសៃតំណាងដល់ ព្រះពុទ្ធរូប៥ ព្រះអង្គ និង៩សរសៃតំណាងឲ្យភពផ្កាយព្រះគ្រោះ។

តំបន់កម្សាន្តល្បីៗទាំង៥ មនុស្សទៅលេងច្រើនថ្ងៃចូលឆ្នាំថ្មី

រូបភាព៖ alisoninasia

អ្វីដែលរៀបរាប់ខាងលើ តេជគុណ អួង សុខអេង រួមទាំងលោក អ៉ឹម បូរិន សុទ្ធតែមានសង្ឃដីកានិងបកស្រាយថាអុជធូបទទួលទេវតា គឺមិនកំណត់ថាប៉ុន្មានសរសៃ ហើយក៏ពុំបានបញ្ជាក់ថាត្រូវអុជប៉ុន្មានសរសៃឲ្យច្បាស់លាស់ទេ។ ប៉ុន្តែបើយោងតាមសៀវភៅមហាសង្ក្រានឆ្នាំថ្មី ថាចំណោមគ្រឿងរណ្ដាប់ផ្សេងៗ គឺត្រូវមានរៀបធូបប្រាំសរសៃនិងទៀនប្រាំដើមផងសម្រាប់ថ្វាយទេវតាឆ្នាំថ្មី។

នាសម័យព្រហ្មញ្ញសាសនា គេប្រើភ្លើងដើម្បីបូជាគ្រឿងដង្វាយទៅដល់ទេវរាជ ដោយមានជំនឿថាផ្សែងភ្លើងនឹងអាចហោះហើរ ដល់ឋានសួគ៌។ លុះក្រោយៗមកគេប្រើផ្សែងធូបជាតំណាងវិញ។ លុះខ្មែរយើងត្រលប់មកកាន់ព្រះពុទ្ធសាសនា ក៏ជាប់មកទំនៀមទម្លាប់នេះរហូតមកដល់សព្វថ្ងៃ៕

អត្ថបទ៖ មាន រតនា

ឆក់កាបូបបានហើយជិះម៉ូតូរត់ ទៅបុក នឹងរថយន្តរ៉ង់រ៉ូវែ ដួល ទើប ចាប់ខ្លួនបាន (មានវីដេអូ)

ប្រភពមកពី៖ khmerload

រាជធានីភ្នំពេញ ៖ បុរសជនសង្ស័យជាចោរឆក់កាបូបពីរនាក់ ត្រូវបានកម្លាំងមាន សមត្ថកិច្ចនគរបាល ធ្វើការឃាត់ ខ្លួនបាន ក្រោយពី ពួកគេជិះម៉ូតូ មួយគ្រឿង ធ្វើសកម្មភាពឆក់ កាបូបពីស្ត្រី អ្នកធ្វើដំណើរ តាមផ្លូវម្នាក់ បានហើយ ជិះម៉ូតូគេចខ្លួន ទៅបុកនឹង រថយន្តរ៉ង់រ៉ូវែរ មួយគ្រឿងដួល ។ ករណីនេះ បានកើតឡើង កាលពីម៉ោង ១និង ៥២នាទីរសៀល ថ្ងៃទី៨ ខែមេសា ឆ្នាំ២០១៥ នៅចំណុចខាង មុខផ្ទះលេខ៦B ផ្លូវលេខ៣០២ ក្នុងសង្កាត់ បឹងកេងកងទី១ ខណ្ឌចំការមន ។

តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា ជនសង្ស័យទាំងពីរនាក់ ដែលបាន ឃាត់ខ្លួននេះ មានទី១ឈ្មោះម៉េង ពិសី អាយុ១៩ឆ្នាំ ជាអ្នកធ្វើសកម្មភាព ឆក់ និងទី២ ឈ្មោះហេង សុភ័ក្រ អាយុ២១ឆ្នាំ មានមុខរបរជា អ្នកលក់កាហ្វេ ជាអ្នកបើកបរ ម៉ូតូធ្វើសកម្មភាព ពួកគេមាន ទីលំនៅក្នុង សង្កាត់ផ្សារដើមថ្កូវ ខណ្ឌចំការមន បានជិះម៉ូតូ ម៉ាកឌ្រឺមសង់ សេ១២៥ ព៌ណខ្មៅ ពាក់ស្លាក លេខភ្នំពេញ ១BL-២៣៩៣ មួយគ្រឿង បានធ្វើ សកម្មភាព ឆក់កាបូបពីនារី រងគ្រោះមានឈ្មោះ កែវ ខេមរិន្ទ អាយុ២៧ឆ្នាំ ជាបុគ្គលិក ក្រុមហ៊ុនឯកជនមួយ មានទីលំនៅក្នុង សង្កាត់ទន្លេបាសាក់ ខណ្ឌចំការមន នៅពេលដែល កំពុងតែជិះម៉ូតូ មួយគ្រឿងម៉ាកណិច ព៌ណស ពាក់ស្លាកលេខ ភ្នំពេញ១BL-៨២៩២ តែម្នាក់ ឯងទៅផ្ទះ ។

តាមប្រភពដដែលបានប្រាប់បន្តទៀតថា មុនពេលកើតហេតុស្ត្រីរងគ្រោះបានធ្វើ ដំណើរតាម ម៉ូតូតែម្នាក់ឯង ចេញពី កន្លែងធ្វើការ សំដៅទៅផ្ទះ ក្នុងទិសដៅពីលិចទៅ កើតតែម្នាក់ ឯង លុះដល់ កន្លែងកើតហេតុ ក៏មានជន សង្ស័យពីរនាក់ ជិះម៉ូតូ មួយគ្រឿង មកពីក្រោយ ធ្វើសកម្មភាពឆក់ យកកាបូបពី នារីរងគ្រោះទៅបាត់តែម្តង ។ ពេលដែលឆក់ កាបូបពីនារីរងគ្រោះ បានហើយ ជនសង្ស័យទាំងពីរ នាក់ ក៏ព្យាយាម ជិះម៉ូតូដើម្បី រត់គេច ពីកន្លែងកើតហេតុ លុះដល់ចំណុច ភ្លើងស្តុបផ្លូវបំបែកលេខ ២៩៤និង ផ្លូវព្រះនរោត្តម ដែលនៅ មិនឆ្ងាយប៉ុន្មានពី កន្លែងកើតហេតុនោះ ក៏បានទៅ បុកនឹងរថយន្ត ម៉ាករ៉ង់រ៉ូវែរ ដួលតែម្តង ។ ពួកគេទាំង ពីរនាក់ត្រូវបានក្រុម ប្រជាពល ដែលបានឃើញ ហេតុការណ៏នោះ នាំគ្នាស្ទុះទៅចាប់ និងវាយម្នាក់ មួយដៃ មួយជើង ឡើងទ្រមខ្លួន ទើបយក ទៅប្រគល់ អោយកម្លាំងនគរបាល ព្រហ្មទណ្ឌកំរិតស្រាល រាជធានីភ្នំពេញ ដែលនៅ ប្រចាំការជិត នោះទៅ ។

កាបូបត្រូវបានប្រគល់ជូនទៅនារីរងគ្រោះវិញ ចំណែកឯជនសង្ស័យជាចោរឆក់ទាំងពីរនាក់ ត្រូវបានបញ្ចូន ទៅកាន់ ការិយាល័យព្រហ្មទណ្ឌកំរិត ស្រាលរាជធានីភ្នំពេញដើម្បី ចាត់ការទៅ តាមនីតិវិធី នៃច្បាប់ជាបន្ត ទៅទៀត៕

ផ្តល់សិទ្ធដោយ កោះសន្តិភាព

ខឹងបងថ្លៃ វាយធ្វើបាបប្អូនស្រី និងជេរម្តាយ ទាញពូថៅកាប់ក្បាល ១០ពូថៅស្លាប់ ក្នុងថ្លុកឈាម

ប្រភពមកពី៖ khmerload

ខេត្តព្រះវិហារ ៖ បុរសម្នាក់ដែលជាប្អូន ថ្លៃឈាមរាវខឹងបងថ្លៃ វាយទាត់ធាក់ធ្វើបាប ប្អូនស្រីរបស់ខ្លួន និង ជេរម្តាយខ្លាំង ពេកក៏ទាញពូថៅ កាប់បងថ្លៃ ចំនួន១០ពូថៅ ចំក្បាល និងកញ្ចឹង-ក បណ្តាលឱ្យស្លាប់ក្នុង ថ្លុកឈាមយ៉ាង អាណោចអាធម៌ ។ ហេតុការណ៍ដ៏ សាហាវព្រៃផ្សៃ នេះបានកើតឡើង កាលពីវេលាម៉ោង ៩យប់ថ្ងៃ ទី០៦ ខែមេសា ឆ្នាំ២០១៥ នៅខាងក្រោយ ផ្ទះជនរងគ្រោះ ស្ថិតនៅ ភូមិឈើទាល គង ឃុំជាំក្សាន្ត ស្រុកជាំក្សាន្ត ខេត្តព្រះវិហារ ។

លោកវរសេនីយ៍ត្រីព្រំ ក្អូង នាយការិយាល័យនគរបាល ព្រហ្មទណ្ឌកម្រិតធ្ងន់បានឱ្យដឹងថា ដោយមានការចង្អុលបង្ហាញ និងដឹកនាំផ្ទាល់ពីលោក កែវ ចំរើន ស្នងការរង និងជាប្រធានការិយាល័យ កណ្តាលព្រហ្មទណ្ឌ សមត្ថកិច្ចឈានទៅ ដល់ការចាប់ខ្លួនជនសង្ស័យ រួមនឹងវត្ថុ តាង ពូថៅនៅនឹងកន្លែងកើតហេតុ ។

លោកប្រធានការិយាល័យ នគរបាលព្រហ្មទណ្ឌកម្រិត ធ្ងន់បានឱ្យដឹងទៀត ថា ជនសង្ស័យមានឈ្មោះ គិន ហ៊ុច ភេទប្រុស អាយុ២៩ឆ្នាំ មុខរបរជាកសិករ រីឯជនរងគ្រោះដែល ត្រូវបងថ្លៃ មានឈ្មោះទឹម ហេង ហៅណាល់ ភេទប្រុស អាយុ៤៥ឆ្នាំ មុខរបរឡើង ភ្នំកាប់ឈើ អ្នក ទាំង២មានទី លំនៅភូមិ-ឃុំកើតហេតុ ។

ប្រភពបានឱ្យដឹងទៀតថា ជនរងគ្រោះជាបងថ្លៃត្រូវជនសង្ស័យ ជាប្អូនថ្លៃកាប់នឹងពូថៅចំនួន ១០ពូថៅ ត្រង់កញ្ចឹង-ក និងក្បាលរហូត ស្លាប់ភ្លាមៗក្នុង ថ្លុកឈាមយ៉ាង អាណោចអាធម៌ នៅជិត ពាងទឹកក្រោយផ្ទះ របស់ជនរងគ្រោះ ។

នៅចំពោះមុខសមត្ថកិច្ច ជនសង្ស័យ បានសារភាពថា ខណៈខ្លួនមកពីស្រែមិន ទាន់ទាំងបានបាយ ហូបផង ក៏ឃើញម្តាយ អង្គុយយំនៅ មុខផ្ទះ ហើយបាន ប្រាប់ខ្លួនថា បងថ្លៃឯងបានធ្វើបាប បងស្រីឯងរហូត ដេកពេទ្យ ហើយថែមទាំង ជេរម៉ែទៀត ។ ដោយខឹង បងថ្លៃ ដែល ហ៊ានជេរម្តាយ ខ្លួនខ្លាំងពេក ខ្លួន(ជនសង្ស័យ)ក៏បានទាញ ពូថៅហើយឡើង ទៅលើផ្ទះបម្រុង កាប់ជនរង គ្រោះ តែជន រងគ្រោះ(បងថ្លៃ) បានរត់ចុះ មកក្រោម ខ្លួនក៏ចុះតាមដល់ ក្រោមផ្ទះកាប់ ១ពូថៅចុះក្បាល តែជនរងគ្រោះ នៅតែបម្រុងងើបរត់ ទៅហៅឱ្យ គេជួយទៀត ខ្លួនក៏ កាប់៩ពូថៅ ថែមទៀតបណ្តាល ឱ្យស្លាប់ភ្លាមៗទៅ ។

ក្រោយពីការឃាត់ខ្លួន និងវត្ថុតាង ព្រមទាំងចម្លើយសារភាពរបស់ជនសង្ស័យ សមត្ថកិច្ចជំនាញ បាន កសាងសំណុំ រឿងបញ្ជូនទៅ តុលាការ ដើម្បីចាត់ការ ច្បាប់ ៕

ផ្តល់សិទ្ធដោយ កោះសន្តិភាព

Tuesday, April 7, 2015

ពិធីដង្ហែ វីរនារី កែ ឡេង កក្រើករាជធានីភ្នំពេញចាប់ផ្តើមស្អែក

ប្រភពមកពី៖ news.sabay.com.kh

ម្ចាស់មេដាយមាសប៉េតង់ពិភពលោក អ្នកស្រី កែ ឡេង នឹងទទួលបាននូវពិធីដង្ហែដ៏អធិកអធមមួយនៅរាជធានីភ្នំពេញវេលាម៉ោង២:៣០រសៀល ថ្ងៃស្អែក ដើម្បីជាសក្ខីភាពនៃការលើកកម្ពស់ និងអបអរសាទរចំពោះស្នាដៃដែលអ្នកស្រីទទួលបានកន្លងមកសម្រាប់មុខមាត់ប្រទេសជាតិនៅឆាកអន្តរជាតិ។

អ្នកស្រី កែ ឡេង

តាមរយៈ Page របស់ NOCC ថា ពិធីដង្ហែដ៏ធំនេះនឹងចាប់ផ្ដើមដំបូងនៅវេលាម៉ោង២:៣០រសៀល ថ្ងៃទី៩ ខែមេសា ចេញពីវិមានសន្ដិភាពឆ្ពោះទៅកាន់វិមានឯករាជ្យ ហើយបន្ដទៅសួរច្បារសម្ដេចតេជោ ហ៊ុន សែន មុនពេលបន្តដង្ហែទៅបញ្ចប់នៅពហុកីឡដ្ឋានជាតិអូឡាំពិកកម្ពុជា។ នៅទៅនោះក៏នឹងមានការចូលរួមពី ប្រជាពលរដ្ឋ និងលោក ថោង ខុន រដ្ឋមន្ដ្រីក្រសួងទេសចរណ៍ និងជាប្រធាន NOCC, លោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា ព្រមទាំងកីឡាករ ការិនីជាច្រើនទៀត។

ប៉ុន្តែមុន មុនកម្មវិធីដង្ហែក្បួនអបអរសារទចេញដំណើរ ម្ចាស់មេដាយមាសប៉េតង់ពិភពលោក កែ ឡេង នឹងទទួលបានការអនុញ្ញាតចូលជួបសម្តេច ហ៊ុន សែន និងអត្តពលិកពីរប្រភេទទៀតគឺកីឡាយូដូ និងសីប៉ាក់តាក្រក៏ចូលរួមដែរនៅវិមានសន្តិភាព។ សម្ដេច ហ៊ុន សែន នឹងសំណេះសំណាលជាមួយកីឡាករ-កីឡាការិនីទាំង ៣ប្រភេទ ព្រមទំាងមានកញ្ចប់ប្រាក់រង្វាន់លើកទឹកចិត្តចំនួន៦៤លានរៀល និងបំពាក់គ្រឿងឥស្សរិយយសជាតិថ្នាក់មហាសេរីវឌ្ឍន៍ដល់ កែ ឡេង។

កីឡាការិនីប៉េតង់ជម្រើសជាតិ កែ ឡេង បានឈ្នះមេដាយមាសប៉េតង់ពិភពលោកក្នុងព្រឹត្តិការណ៍អន្តរជាតិ Women’s World Championship of petanque នៅប្រទេសបារាំង កាលពីឆ្នាំ២០១៣ និងឈ្នះមេដាយលក្ខណៈអន្តរជាតិជាច្រើនទៀត។ កាលពីចុងសប្តាហ៍កន្លងទៅ អ្នកស្រីក៏ទើបឈ្នះបានមេដាយមាសពីរគ្រឿងទៀតពីព្រឹត្តិការណ៍ជើងឯកប៉េតង់អាស៊ានដែលកម្ពុជាធ្វើជាម្ចាស់។ ពិធីដង្ហែនេះរៀបចំដោយក្រសួងអប់រំ យុវជន និងកីឡា ព្រមទាំងគណៈកម្មាធិការជាតិអូឡាំពិក និងសហព័ន្ធប៉េតង់កម្ពុជា៕

អត្ថបទ៖ ជាន ចាន់រ៉ា

ត្រួសៗពីអ្នកជំនាញ “ធ្វើម៉េចឲ្យ Website មួយដំណើរបាន”

ប្រភពមកពី៖ news.sabay.com.kh

សព្វថ្ងៃមានគេហទំព័រជាច្រើននៅលើបណ្ដាញអ៊ីនធឺណិតដែលប្រិយមិត្តតែងតែចូលទស្សនាព័ត៌មានផ្សេងៗដែលកើតមានហើយក៏មានការងឿងឆ្ងល់ថាហេតុអីបានជាគេហទំព័រទាំងនោះអាចមើលបានដោយសារអ្វី?

រាល់ចម្ងល់ទាំងនេះមានអ្នកជំនាញបង្ហាញត្រួសៗថាធ្វើយ៉ាងណាដើម្បីឲ្យគេហទំព័រមួយដំណើរការបាន។

លោក ហេង សាមឌី អ្នកប្រឹក្សាយោបល់ព័ត៌មានវិទ្យានៃ ICS បានឲ្យដឹងថា ដើម្បីឲ្យគេហទំព័រមួយដំណើរការបានលុះត្រាតែមាន Domain និង Hosting។ Domain និង Hosting មាន ២ គឺ មួយមិនចំណាយលុយ និង មួយទៀតត្រូវការចំណាយលុយ ដើម្បីទិញពីក្រុមហ៊ុនដែលមានសេវាកម្មលក់ Domain និង Hosting។

សម្រាប់ Domain គឺប្រិយមិត្តអាចទិញសេវាកម្មនេះក្នុងស្រុក ឬ ក្រៅស្រុកបាន តម្លៃប្រហែល ១០ ដុល្លារក្នុងមួយឆ្នាំដែលអាចសំគាល់កន្ទុយក្រោយដូចជា (.Com) (.edu) ជាដើម តែបើ Domain មានកំណត់សំគាល់ (.kh) គឺត្រូវបំពេញបែបបទសុំសិទ្ធទិញនៅក្រសួងប្រៃសណីយ៍ផ្ទាល់និងត្រូវចំណាយលុយមួយតង់ទៀត។ ម្យ៉ាងទៀតការដែលចង់បាន .kh គឺជាការសំគាល់គេហទំព័រមួយនោះស្ថិតក្នុងប្រទេសកម្ពុជាដូចគេហទំព័រសប្បាយ www.sabay.com.kh។

ចំណែក Hosting វិញគឺប្រិយមិត្តអាចទិញសេវាកម្មនេះក្នុងស្រុក ឬ ក្រៅស្រុកបានចំណែកតម្លៃទាបបំផុតក៏តម្លៃ ៣០ ដុល្លារក្នុង ១ ឆ្នាំ។ Hosting គ្មានកំណត់សំគាល់ជាអក្សរអ្វីទេគ្រាន់តែមាននាទីយកទិន្នន័យផ្ទុកលើ Server មួយ។

អ្នកប្រឹក្សារូបនេះបន្តថា ការទិញ Domain និង Hosting នៅក្រៅស្រុក និង ក្នុងស្រុកខុសគ្នាត្រង់ថា ក្រៅស្រុកពិបាកក្នុងការប្រាស្រ័យទាក់ទងគ្នាម្យ៉ាងទៀតត្រូវប្រើ Visa Card ឬ Master Card ដើម្បីទិញ។ សម្រាប់ក្នុងស្រុកគឺប្រិយមិត្តងាយស្រូលទាក់ទងគ្នាពេលមានបញ្ហា និង គ្រាន់តែទៅដល់ក្រុមហ៊ុនផ្ទាល់ដើម្បីទិញ ឬអាចបង់តាមសេវាកម្មក្នុងស្រុក។

សាមឌី បន្ថែមថា សម្រាប់គេហទំព័រមាន ២ ប្រភេទ គឺគេហទំព័រលក្ខណៈជា Web blog ប្រៀបដូចទៅការជ្រកនៅក្រោមដំបូលផ្ទះគេដែរ ព្រោះគ្មានការចំណាយលុយ , បិទសិទ្ធិមិនឲ្យរៀបចំ feature ឬ Upload រូបភាពកន្លែងដែលអ្នកប្រើប្រាស់ចង់បាន ជាពិសេសមិនអាចឲ្យរកលុយតាម Google AdSense។

មួយវិញទៀតគឺគេហទំព័រធម្មតាដែលចែកចេញជា ២ គឺលក្ខណៈជា CMS ដូចជា Joomla, WordPress, Druple ជាដើមដែលមានគំរូឲ្យរើសស្រាប់ៗ, កែកូដបាន, ងាយស្រួលក្នុងការដាក់បញ្ចូលរូបភាព។ ហើយមួយទៀតគេហទំព័រលក្ខណៈសរសេរកូដទាំងស្រុង ទាមទារឲ្យមានការរចនាតាមកូដដែលចង់បាន និងពិបាកក្នុងការដាក់បញ្ចូលរូបភាព។

ចុចអាន៖ ដល់ដីកូរ៉េមួយអាទិត្យ សិស្សពូកែ IT មួយរូបនិយាយពីចំណាប់អារម្មណ៍ត្រៀមចូលសមរភូមិសិក្សា

អត្ថបទ៖ ដារ៉ាឆានី

បួនឆ្នាំចុងក្រោយគ្រោះថ្នាក់ចរាចរណ៍ឆក់យកជីវិតមនុស្សប៉ុន្មាននាក់ ឱកាសបុណ្យចូលឆ្នាំថ្មី?

ប្រភពមកពី៖ news.sabay.com.kh

មនុស្សម្នារាប់ម៉ឺននាក់នឹងត្រូវធ្វើដំណើរទៅកាន់ស្រុកកំណើតក៏ដូចទីរមណីដ្ឋាននានា ក្នុងឱកាសបុណ្យចូលឆ្នាំថ្មីប្រពៃណីជាតិនៅចុងសប្តាហ៍នេះ និងដើមសប្តាហ៍ក្រោយ។ ទន្ទឹមគ្នានេះសុវត្ថិភាពចរាចរណ៍ជាបញ្ហាចម្បងមួយ ខណៈចំនួនគ្រោះថ្នាក់ស្លាប់ និងរងរបួសបានកើតឡើងច្រើន ក្នុងឱកាសបុណ្យជាតិធំៗ មានជាអាទិ៍បុណ្យភ្ជំបិណ្ឌ និងបុណ្យចូលឆ្នាំខ្មែរ។ ថ្ងៃនេះ Sabay នឹងបង្ហាញតួលេខគ្រោះថ្នាក់ចរាចរណ៍ក្នុងឱកាសបុណ្យចូលឆ្នាំថ្មីរយៈពេល៤ឆ្នាំចុងក្រោយដល់ប្រិយមិត្តអ្នកអានបានជ្រាប និងទុកជាការប្រុងប្រយ័ត្ន។

២០១១

នៅក្នុងរយៈពេល៥ថ្ងៃនៃពិធីបុណ្យចូលឆ្នាំខ្មែរ ឆ្នាំ២០១១កន្លងទៅ ករណីគ្រោះថ្នាក់ចរាចរណ៍មានចំនួន ២១១ករណី បានបណ្ដាលឲ្យមនុស្ស៥៨នាក់ស្លាប់ របួសធ្ងន់ចំនួន២៧៩នាក់ របួសស្រាល២០៥នាក់។ សរុបទៅ គិតជាមធ្យមក្នុងមួយថ្ងៃគឺមានមនុស្សជាង១១នាក់បានស្លាប់ដោយសារ គ្រោះថ្នាក់ចរាចរណ៍។

២០១២

គ្រោះថ្នាក់ចរាចរណ៍នៅក្នុងឱកាសចូលឆ្នាំ ខ្មែរប្រពៃណីជាតិចាប់ពីថ្ងៃទី១២ ដល់ថ្ងៃទី១៦ មេសា ២០១២ ឆ្នាំកន្លងទៅគ្រោះថ្នាក់ចរាចរណ៍នៅទូទាំងប្រទេសកើតឡើងសរុប ចំនួន១៦លើក ក្នុងនោះមនុស្សចំនួន៤៨នាក់ស្លាប់និងរបួសធ្ងន់-ស្រាលចំនួន៣៤៤នាក់ ។

២០១៣

គ្រោះថ្នាក់ចរាចរណ៍ក្នុងរយៈពេល ៥ថ្ងៃ នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ បានធ្វើឱ្យមនុស្សស្លាប់ចំនួន ៦៦នាក់និងរបួស ៣០៥នាក់ គឺច្រើនជាងឆ្នាំ២០១២ ចំនួន ១៨នាក់ ដែលនៅឆ្នាំ២០១២ មានមនុស្សស្លាប់ចំនួន៤៨នាក់។ មូលហេតុដែលធ្វើឲ្យគ្រោះថ្នាក់ចរាចរណ៍នៅតែកើតឡើងរហូតដល់ស្លាប់ នោះ ភាគច្រើនមកពីអ្នកបើកបរលើសល្បឿនកំណត់ និងបើកបរក្នុងពេលស្រវឹង មិនប្រកាន់ស្ដាំ ជែងគ្នា បត់ឆ្វេងស្ដាំមិនប្រយ័ត្នជាដើម។

២០១៤

មនុស្ស ៣០នាក់ស្លាប់ដោយគ្រោះថ្នាក់ចរាចរណ៍នៅថ្ងៃបុណ្យចូលឆ្នាំថ្មី។ ចំនួននេះគិតចាប់ពីថ្ងៃទី១៣ ដល់ថ្ងៃទី១៥ ខែមេសា នៃពិធីបុណ្យចូលឆ្នាំខ្មែរឆ្នាំកើតឡើងនៅទូទាំងប្រទេសជិត ១០០ករណី និងបណ្ដាលឲ្យរបួសជាង ២០០នាក់។ បញ្ហាគ្រោះថ្នាក់ភាគច្រើនកើតឡើងដោយសារអ្នកបើកបរមិនគោរពច្បាប់ គឺបើកបរក្នុងល្បឿនលឿន និងបើកប្រជែងគ្នា៕

អត្ថបទ៖មៃ សុខលីម

គិតស្រួលបួលមុនសម្រេចចិត្តរើស Laptop ឬ Tablet

ប្រភពមកពី៖ news.sabay.com.kh

វិស័យបច្ចេកវិទ្យាចេះតែរីកចម្រើនទៅជាលំដាប់ ដោយបានផ្ដល់ភាពងាយស្រួលជាច្រើនដល់ប្រជាជនទូទាំងពិភពលោក។ ដូចជាកុំព្យូទ័រ Desktop ជាដើម ពីមុនអាចប្រើបានតែនៅលើតុមួយកន្លែងតែប៉ុណ្ណោះ តែឥលូវមាន Laptop ដែលអាចប្រើប្រាស់ផ្លាស់ទីបានគ្រប់ទីកន្លែង។ ស្របគ្នានេះដែរក្រុមហ៊ុនធំៗមួយចំនួនក៏បានបង្កើត Tablet ដែលកាន់តែមានរូបរាងតូចជាងLaptopទៅទៀត ចំណែកឯមុខងារវិញស្ទើរតែដូច Laptop ទៅហើយ។

បើដូច្នេះ តើរវាង Laptop និងTablet យុវវ័យចូលចិត្តប្រើប្រាស់មួយណាជាង?

ឆ្លើយតបទៅនឹងសំណួរខាងលើ យុវជន មាន រតនា និស្សិតឆ្នាំទី២ នៃវិទ្យាស្ថានអភិវឌ្ឍន៍និស្សិត ផ្នែកអក្សរសាស្ត្រអង់គ្លេស បានរៀបរាប់ប្រាប់ Sabay ថាខ្លួនចូលចិត្តប្រើប្រាស់ Laptopជាង Tablet ។

យុវជនដែលប្រើប្រាស់ Laptop រាល់ថ្ងៃប្រាប់ថា៖ “ថ្វីត្បិតតែ Tablet អាចធ្វើការបានស្ទើរតែដូច Laptopមែន តែ Laptop វាមានសមត្ថភាពខ្ពស់ជាង ហើយការប្រើប្រាស់ក៏ងាយស្រួលជាង”។

ស្រដៀងគ្នានេះដែរយុវជន ព្រីង សុភានី ជានិស្សិតផ្នែកវិទ្យាសាស្ត្រកុំព្យូទ័រនៃសកលវិទ្យាល័យន័រតុនបានលើកឡើងថា៖ ” ខ្ញុំរៀនខាងផ្នែក IT ប្រាកដជាចូលចិត្តប្រើLaptop ជាងហើយ” ។

យុវជនរូបនេះបញ្ជាក់ថា បើគិតពីតម្លៃ Laptop និង Tablet តម្លៃអាចប្រហាក់ប្រហែលប៉ុន្តែសមត្ថភាពការប្រើប្រាស់មិនដូចគ្នាទេ។ Laptop មានសមត្ថភាពខ្ពស់ជាង អាចផ្ទុកទិន្នន័យបានច្រើន ងាយស្រួលក្នុងការបញ្ចូលកម្មវិធីនានាសម្រាប់ការប្រើប្រាស់។

តែទោះបីជាយ៉ាងណាបុគ្គលិកនៅក្រុមហ៊ុនឯកជនមួយបែរជាចាប់អារម្មណ៍ Tablet ជាជម្រើសក្នុងការទិញប្រើប្រាស់។

កញ្ញា ម៉ាលីដា បានឲ្យដឹងថា សម្រាប់ការធ្វើការរាល់ថ្ងៃត្រឹមតែ Word និង Excel គិតថា Tabletគ្រប់គ្រាន់ហើយ អាចបំពេញតម្រូវការប្រើប្រាស់បាន។ ណាមួយវាតូច ស្រាលងាយស្រួលបំផុតក្នុងការយកតាមខ្លួន ចំណែកតម្លៃក៏សមរម្យផងដែរ។

ដោយឡែកអ្នកនាង នារី អ្នកគ្រប់គ្រងទូទៅប្រចាំហាងលក់កុំព្យូទ័រចន្រ្តា បានមានប្រសាសន៍ប្រាប់Sabay ថា៖ “Tablet មិនអាចយកឈ្នះLaptopបានទេ សម្រាប់ទីផ្សារទិញប្រើប្រាស់។

ម្ចាស់ហាងរូបនេះបញ្ជាក់ថា Laptopអាចប្រើប្រាស់បានទូលំទូលាយជាង ដោយសារវាមានសមត្ថភាពផ្ទុកទិន្នន័យបានធំ ងាយស្រួលក្នុងការដំឡើងកម្មវិធីនានា ជាពិសេសសម្រាប់ការប្រើប្រាស់ក្នុងការបំពេញការងារនានាជំនួសឲ្យ Desktop។ មួយវិញទៀតតម្លៃរបស់ Tablet ហាក់មានថ្លៃជាង Laptop។

ចំពោះប្រិយមិត្តវិញតើពេញចិត្តមួយណាជាង ?

អត្ថបទ៖ ហៃ សុខហេង