ប្រភពមកពី៖ news.sabay.com.kh
ឆ្នាំមុនក្រោយកំណែទម្រង់ស៊ីជម្រៅរបស់ក្រសួង មានសិស្សមិនតិចនាក់ទេបានធ្លាក់។ បើទោះជាក្រសួងបានរៀបចំឲ្យមានការប្រលងលើកទី២ក្តី ក៏ពេលនោះសិស្សច្រើនសន្ធឹកសុខចិត្តបោះបង់ឱកាសអវត្តមានមិនចូលប្រលងដែរ។ ចុះឆ្នាំនេះ អ្នកធ្លាក់បាក់ឌុបលើកមុន នៅតែចង់មកភ្លក់ក្នុងការប្រលងដ៏សែនតឹងនេះទៀតឬអត់?
រូបតំណាង
យុវសិស្សស្រីម្នាក់ សុំមិនបញ្ចេញឈ្មោះពិត ដោយគ្រាន់ប្រាប់ឈ្មោះហៅក្រៅថារីកាដោយសារកញ្ញាមានភាពខ្មាសអៀន បាននិយាយថា នៅតែជម្នះមកប្រលងម្ដងទៀត ទោះឆ្នាំមុនធ្លាក់បាក់ឌុបក៏ដោយ។ ពីដំបូងឡើយ រីកាថាក៏គិតចង់បោះបង់ដែរ តែដោយសារមានការលើកទឹកចិត្តពីបងប្អូននិងឪពុកម្ដាយ យុវសិស្សអាយុ១៨ឆ្នាំនេះ ក៏សម្រេចចិត្តចុះឈ្មោះចូលរៀនជាថ្មីទៅរៀនជាមួយសិស្សទើបឡើងទី១២ឆ្នាំនេះឡើងវិញ ដោយផ្លាស់សាលាថ្មី។ “ខ្ញុំចំណាយពេលជិតមួយខែទម្រាំធ្វើចិត្តបាន ព្រោះខ្ញុំខ្មាសគេខ្លាំង ខ្ញុំអន់ចិត្ត គេងយំរាល់យប់។ តែក្រោយមក ខ្ញុំគិតថាមិនមែនមានតែខ្ញុំម្នាក់ធ្លាក់ឡើយ មានអ្នកដទៃធ្លាក់ច្រើនដែរ ទើបមកចុះឈ្មោះចូលរៀនវិញទៅ”។
យ៉ាងណា រីកាបានបង្ហើបពីមូលហេតុដែលធ្វើឲ្យនាងធ្លាក់បាក់ឌុបថា មកពីកត្តាគ្រូមិនសូវយកចិត្តទុកដាក់ក្នុងការបង្រៀន គួបផ្សំកត្តាកញ្ញាផ្ទាល់មិនសូវបានរៀនទៀងទាត់។ ដោយឡែកឆ្នាំនេះ រីកាបានចំណាយពេលរៀនគួរ៤ម៉ោងក្នុង១ថ្ងៃលើមុខវិជ្ជាគន្លឺះៗដូចជា គណិត រូប គីមី ជីវៈ និងខ្មែរ ព្រមទាំងដាក់កំហិតខ្លួនឯងត្រូវស្វ័យសិក្សារហូតដល់ម៉ោង១១យប់ទើបចូលគេង ជារៀងរាល់យប់។
សិស្សរៀននៅវិទ្យាល័យហ៊ុនសែនភ្នំពេញថ្មីរូបនេះ ប្រាប់ទាំងអារម្មណ៍ក្តុកក្តួលថា នាងចង់បន្តការសិក្សាឲ្យបានខ្ពង់ខ្ពស់ ដូច្នេះនាងអត់ចង់ធ្វើជាសិស្សស្វ័យរិនទេបំណាច់ចំណាយពេលមួយឆ្នាំហ្នឹងគេដែរ ។ ឆ្នាំនេះ កញ្ញាថាត្រូវប្ដេជ្ញាចិត្តប្រលងជាប់ឲ្យបាន។
ស្អែកនេះ ជាពេលរីកាត្រូវឈានជើងចូលមណ្ឌលប្រលងម្តងទៀត តែលើកនេះនាងថា ឆ្នាំនេះមិនដូចឆ្នាំមុនឡើយ ឆ្នាំមុនសង្ឃឹមធ្លាក់ តែឆ្នាំនេះសង្ឃឹមជាប់៧០% ។
ក្នុងសម័យប្រលងបាក់ឌុប២០១៤ ជាប់ត្រឹមតែ ១៧,៩៤% ប៉ុណ្ណោះ ចំណោមបេក្ខជនសរុប ៦៨០០០ នាក់ និងអវត្តមានប្រលងជិតមួយម៉ឺននាក់សម្រាប់ការប្រលងលើកទី២៕
0 comments:
Post a Comment