ប្រភពមកពី៖ news.sabay.com.kh
ជិះកង់ជាការហាត់ប្រាណមួយដែលជួយឲ្យរាងកាយមាំមួន បញ្ចេញញើស និងអាចសម្រកទម្ងន់បានបើធ្វើបានត្រឹមត្រូវ។ អ្នកខ្លះចង់ស្រកទម្ងន់ដោយសារជិះកង់ តែក្រោយបញ្ចេញញើសហើយបែរជាទៅញ៉ាំ ឬគេងលើសដើមធ្វើឲ្យបំណងនោះមិនសម្រេច និងតាំងនិយាយថា ជិះកង់មិនអាចជួយឲ្យស្រកទម្ងន់បាន។ ឥលូវសាកធ្វើតាមចំណុចទាំង ៧ ខាងក្រោមនេះ អ្នកប្រាកដជាអាចស្រកទម្ងន់បានជាក់ជាមិនខាន។
១. ញ៉ាំអាហារពេលព្រឹកមុនពេលជិះកង់
គ្មានអ្វីដែលជួយដល់រាងកាយល្អបំផុតជាង អាហារពេលព្រឹកដ៏ត្រឹមត្រូវនោះទេ។ មិនញ៉ាំអាហារពេលព្រឹកមិនត្រូវតែមិនជួយធ្វើឲ្យរាងកាយមានកម្លាំង ថែមទាំងធ្វើឲ្យរាងកាយអ្នកងាយនឹងចាប់យកសារជាតិបំប៉ននៅពេលក្រោយពិសេសគឺជាតិខ្លាញ់តែម្តង។ ការមិនញ៉ាំអាហារនឹងធ្វើឲ្យដំណើរការជំរុញថាមពលចាំចាប់យកអ្វីដែលវាមិនទទួលបានពេលអត់ញ៉ាំលើកមុន ដូច្នេះពេលញ៉ាំវាងាយនឹងចាប់យកជាតិខ្លាញ់ដែលងាយនឹងធ្វើឲ្យអ្នកឡើងគីឡូ។
២. កុំចង់បើកញើសខ្លាំងដោយការស្លៀកច្រើនជាន់
អ្នកខ្លះគិតថា ការស្លៀកខោអាវច្រើនជាន់ល្អពេលជិះកង់ ព្រោះវាជួយឲ្យបើកញើសកាន់តែច្រើនឆាប់ស្រកគីឡូលឿន។ តែការគិតនេះមិនល្អទេ ព្រោះបើកញើសច្រើននឹងធ្វើឲ្យបាត់បង់ជាតិទឹក ដែលមិនអាចឲ្យអ្នកជិះបានឆ្ងាយតាមដែលចង់បាន។ មិនតែប៉ុណ្ណោះជាតិទឹកនេះក៏ជាចំណែកមួយជួយឲ្យអ្នកដុតកម្លោចកាឡូរីក្នុងរាយកាយកាន់តែច្រើនពេលជិះកង់។
៣. មិនត្រូវប្រើថ្នាំសម្រកទម្ងន់ឡើយ
មិនត្រូវប្រើសម្រកទម្ងន់ដើម្បីសម្រកទម្ងន់លឿនឡើយ ព្រោះវាអាចមានប្រសិទ្ធភាពត្រឹមរយៈពេលខ្លីប៉ុណ្ណោះ។ ធ្វើដូច្នេះសារជាតិខ្លាញ់ និងវីតាមីនសំខាន់ៗដែលមានក្នុងខ្លួនក៏ទៅជាមួយដែលធ្វើឲ្យរាងកាយចុះខ្សោយងាយប្រឈមនឹងជំងឺដែរ។
៤. ញ៉ាំបន្លែ និងប្រូតេអ៊ីន
បន្លែ និងប្រូតេអ៊ីនពីសាច់មាន់ និងត្រីជាអាហារដ៏ល្អសម្រាប់អ្នកជិះកង់។ ញ៉ាំអាហារទាំងនោះដើម្បីឲ្យរាងកាយទទួលបានវីតាមីន និងប្រូតេអ៊ីនគឺល្អជាងការញ៉ាំថ្នាំបំប៉ន។ ញ៉ាំអាហារដែលធ្វើឲ្យរាងកាយអ្នករឹងមាំ នោះអ្នកនឹងមានសុខភាពល្អដែលអាចជួយឲ្យអ្នកជិះកង់បានកាន់តែឆ្ងាយ ដុតកម្លោចកាឡូរីកាន់តែច្រើន។
៥. ញ៉ាំច្រើនដងពេលជិះកង់
សម្រាប់អ្នកជិះកង់ផ្លូវឆ្ងាយវាជាការល្អដែលញ៉ាំច្រើនដងពេលកំពុងជិះព្រោះវាជួយឲ្យអ្នកជិះកង់កាន់មិនសូវឃ្លាន និងបង្កើនថាមពលជិះកាន់តែខ្លាំង។ ការញ៉ាំច្រើនដងបែបនេះនឹងធ្វើឲ្យអ្នកមិនសូវឃ្លានពេលត្រឡប់មកដល់ផ្ទះវិញ ជៀសវាងការញ៉ាំច្រើនក្រោយនោះដែលនាំឲ្យឡើងទម្ងន់ដដែល។
៦. កំណត់កម្រិតអាហារដែលគួរទទួលទាន
ចង់ស្រកទម្ងន់ការជិះកង់ ការញ៉ាំអាហារក៏ត្រូវគិតគូរដូចគ្នា។ បើជិះកង់ហត់ខ្លាំងហើយមកញ៉ាំសុទ្ធតែអាហារប៉ូវកុំសង្ឃឹមថា នឹងស្រកគីឡូឡើយ។ បែងចែកកម្រិតអាហារដែលអ្នកគួរទទួលទានដោយស្វែងយល់ពីកម្រិតកាឡូរីរបស់វា។ គួរទទួលអាហារដែលមានកម្រិតកាឡូរីសមល្មមនឹងកម្លាំងរាងកាយដែលបានបញ្ចេញ កុំឲ្យលើស។ ការកំណត់កម្រិតកាឡូរីក្នុងអាហារបានត្រឹមត្រូវជួយឲ្យស្រកគីឡូបានរឹតតែលឿន។
៧. ប្រើកម្លាំងខ្លាំងនៅកំណាត់ផ្លូវចុងក្រោយ
ការសិក្សាជាច្រើនរកឃើញថា ការស្រូបយកអុកស៊ីហ្សែនច្រើននៅក្រោយការហាត់ប្រាណនឹងជួយដុតកម្លោចជាតិខ្លាញ់ក្នុងរាងកាយ។ ដូច្នេះ មិនថាជិះដើម្បីសុខភាព ឬជិះចម្ងាយឆ្ងាយទេ គួរចាប់ផ្ដើមដោយសន្សឹមៗ។ ពេលជិតដល់ដំណាក់កាលជិះចុងក្រោយសឹមបញ្ចេញកម្លាំងមកទាំងអស់ ធ្វើដូច្នេះពេលត្រឡប់មកវិញរាងកាយនៅតែក្ដៅដែលអាចដុតកម្លោចកាឡូរីក្នុងរាយកាយបន្តទៀតទោះក្រោយបញ្ចប់ការជិះកង់ទៅហើយក៏ដោយ។
0 comments:
Post a Comment