ប្រភពមកពី៖ sabay.com.kh
Jack Ma គឺជាសហគ្រិនជោគជ័យម្នាក់នៅក្នុងពិភពលោក។ ក្រុមហ៊ុនពាណិជ្ជកម្មអេឡិចត្រូនិក (e-commerce ) របស់លោកឈ្មោះថា Alibaba បានទាក់ទាញអ្នកទិញទំនិញ១០០លាននាក់ក្នុងមួយថ្ងៃ ហើយទ្រព្យសម្បត្តិរបស់លោកគឺមានប្រហែលជា ២០,៤ពាន់លានដុល្លារ។ ប៉ុន្តែមុនពេលដែលលោកបានក្លាយជាមហាសេដ្ឋីមានបំផុតនៅក្នុងប្រទេសចិន Jack Ma ធ្លាប់ជួបឧបសគ្គជាច្រើនដែរ។
នៅក្នុងកិច្ចសម្ភាសន៍ជាមួយនឹងកម្មវិធីទូរទស្សន៍របស់អាមេរិក Charlie Rose មហាសេដ្ឋីរូបនេះបានប្រាប់ឲ្យដឹងថា លោកធ្លាប់បានធ្លាក់ការប្រលងចូលរៀនមហាវិទ្យាល័យចំនួនបីដង ដូច្នេះលោកបានដាក់ការងារ ហើយការងារចំនួន ៣០ កន្លែងផ្សេងៗគ្នា ដែលលោកបានដាក់ពាក្យក៏សុទ្ធតែត្រូវបានគេបដិសេធមិនយកលោកធ្វើការទាំងអស់។
លោក Jack Ma បានប្រាប់នៅក្នុងកម្មវិធី Charlie Rose ថា ៖ “ខ្ញុំធ្លាប់បានដាក់ការងារធ្វើជាប៉ូលិស ប៉ុន្តែត្រូវបានគេបដិសេធដោយថា ខ្ញុំគឺមិនអាចធ្វើប៉ូលិសបានទេ ហើយក្រោយមកខ្ញុំបានទៅដាក់ការងារនៅក្នុងក្រុមហ៊ុន KFC ដោយក្នុងនោះដែរមានបេក្ខជនចំនួន ២៣ នាក់បានដាក់ដែរ តែពួកគេបានជាប់ការងារទាំងអស់ ដោយឡែកមានតែខ្ញុំម្នាក់តែប៉ុណ្ណោះដែលគេមិនរើសយកធ្វើការ”។
ក្នុងឆ្នាំ១៩៩៨ Jack Ma បានបង្កើតក្រុមហ៊ុន Alibaba ហើយលោកបានជួបឧបសគ្គជាច្រើន។ ក្នុងរយៈពេល ៣ ឆ្នាំដំបូងក្រុមហ៊ុនរបស់លោកមិនទទួលបានប្រាក់ចំណេញសោះ ហើយលោកក៏បានរកដំណោះស្រាយផ្សេងទៀត។ រឿងសំខាន់មួយទៀតដែលជាឧបសគ្គរារាំងការងារសម្រាប់ក្រុមហ៊ុននោះគឺក្រុមហ៊ុនគ្មានទុនសម្រាប់ចំណាយ និងគ្មានធនាគារមួយណាសហការជាមួយលោកនោះទេ។ ដូច្នេះលោក Jack Ma បានសម្រេចចិត្តចាប់ផ្ដើមបង្កើតកម្មវិធីចំណាយផ្ទាល់ខ្លួនមួយមានឈ្មោះថា Alipay ដែលជាកម្មវិធីមួយប្រើសម្រាប់ផ្ទេរប្រាក់ពីរូបិយប័ណ្ណផ្សេងគ្នារវាងអ្នកលក់និងអ្នកទិញពីប្រទេសផ្សេងៗគ្នា។
លោក Jack Ma បានបន្ថែមឲ្យដឹងទៀតថា ៖ “នៅពេលដែលខ្ញុំបាននិយាយពី Alipay មានមនុស្សជាច្រើនបាននិយាយថា វាជាគំនិតដ៏ល្ងង់បំផុត ប៉ុន្តែខ្ញុំមិនខ្វល់បើទោះបីវាជាគំនិតល្ងង់ក៏ដោយ ឲ្យតែមនុស្សអាចប្រើប្រាស់វាបាន”។ បច្ចុប្បន្ននេះមានមនុស្សជាង ៨០០ លាននាក់ប្រើប្រាស់ Alipay ៕
អានបន្ត៖ មហាសេដ្ឋី Jack Ma គ្មានអាំងប៉ាវសម្រាប់បុគ្គលិក Alibaba ទេឆ្នាំនេះ
0 comments:
Post a Comment