ប្រភពមកពី៖ sabay.com.kh
ក្រុមហ៊ុនកាន់តែច្រើនក្នុងប្រទេសកម្ពុជា ដូចជាក្រុមហ៊ុនផ្តល់សេវាកម្មអ៊ីនធឺណិត និងសេវាទូរសព្ទជាដើមកំពុងតែប្រើប្រាស់ឧបករណ៍ និងបច្ចេកវិទ្យាណេតវើក ប៉ុន្តែការកង្វះអ្នកឯកទេសដែលមានជំនាញក្នុងការគ្រប់គ្រង និងប្រើប្រាស់ឧបករណ៍ណេតវើកប្រកបដោយប្រសិទ្ធភាពនៅតែជាបញ្ហាចម្បង។ នៅចុងសប្តាហ៍នេះនឹងមានសិក្ខាសាលាមួយលើការពង្រឹងជំនាញណេតវើក ដែលមានការចូលរួមចែករំលែកនិងធ្វើបទបង្ហាញពីក្រុមអ្នកជំនាញ ដើម្បីឲ្យប្រិយមិត្តចូលរួមអាចសិក្សាស្វែងយល់ពីបច្ចេកវិទ្យាមួយនេះ។
លោក សុក សែនមនោរម្យ Senior Network Engineer នៅក្រុមហ៊ុន Eintellego Networks ជាក្រុមហ៊ុនឯកទេសណេតវើកមួយ ដែលមានទីស្នាក់ការនៅទីក្រុងស៊ីដនីប្រទេសអូស្ត្រាលី និងមានការិយាល័យទទួលបន្ទុកបច្ចេកទេសនៅភ្នំពេញឲ្យដឹងថា កង្វះអ្នកឯកទេសជំនាញខាងណេតវើកនៅកម្ពុជា ជាបញ្ហាប្រឈមកំពុងក្លាយជាក្តីព្រួយបារម្ភរបស់ក្រុមហ៊ុននិងម្ចាស់អាជីវកម្មនានា។
ក្រុមហ៊ុនជាច្រើន ដោយរួមទាំងក្រុមហ៊ុនផ្តល់សេវាកម្មអ៊ីនធឺណេត និង សេវាទូរសព្ទផងបានប្រើប្រាស់ឧបករណ៍ និងបច្ចេកវិទ្យាណេតវើក ប៉ុន្តែកង្វះអ្នកឯកទេសដែលមានជំនាញក្នុងការគ្រប់គ្រង និងប្រើប្រាស់ឧបករណ៍ទាំងនោះជាបញ្ហាដែលត្រូវស្វែងរកដំណោះស្រាយ។
ដោយមើលឃើញបែបនេះលោកថា ក្រុមហ៊ុនរបស់លោកនឹងរៀបចំបើកថ្នាក់បណ្ដុះបណ្ដាលជំនាញណេតវើក “eintellego Networks Tech Day” មួយនាពេលខាងមុខនេះ ដែលថ្នាក់បណ្ដុះបណ្ដាលនេះរៀបចំឡើងជាពិសេសសម្រាប់វិស្វករកុំព្យូទ័រទាំងឡាយដែលធ្លាប់ស្គាល់ មានចំណេះដឹងអាចចូលរួមសិក្សាស្វែងយល់ពីដំណើរការនៃឧបករណ៍ណេតវើក និងបច្ចេកវិទ្យាថ្មីៗដែលវាគ្មិនធ្វើបង្ហាញនិងចែករំលែក។
eintellego Networks Tech Day ជាព្រឹត្តិការណ៍ដ៏ល្អសម្រាប់វិស្វករកម្ពុជាដើម្បីរៀនចំណេះដឹងថ្មីមួយអំពីបណ្តាញកុំព្យូទ័រ។ វាក៏ជាព្រឹត្តិការណ៍ដ៏អស្ចារ្យមួយសម្រាប់វិស្វករចែករំលែកបទពិសោធគ្នាលើជំនាញណេវើក។ កាលពីឆ្នាំទៅ កម្មវិធីនេះបានទទួលការចាប់អារម្មណ៍ និងលើកនេះរំពឹងថានឹងមានវិស្វករប្រហែល 50 នាក់ ពីក្រុមហ៊ុនផ្សេងចូលរួម។
លោក សុក សែនមនោរម្យ សង្ឃឹមថា តាមរយៈការទទួលបានការបណ្ដុះបណ្ដាលនេះ អ្នកចូលរួមនឹងបានស្គាល់អំពីបច្ចេកវិទ្យា និងឧបករណ៍ថ្មីៗរបស់ណេតវើក ដែលពួកគេអាចយកទៅបម្រើក្នុងអាជីវកម្មនិងការងារមានភាពងាយស្រួលនិងមានប្រសិទ្ធភាព។
អត្ថបទ៖ ប៊ុណ្ណារ៉ា
0 comments:
Post a Comment