ប្រភពមកពី៖ news.sabay.com.kh
បើសិនជាថ្ងៃណាមួយ មិត្តយុវវ័យត្រូវបានសង្សារជាទីស្រលាញ់ជជីកសួរពីប្រវត្តិ ស្នេហា ខណៈពីមុនមក អ្នកក៏ធ្លាប់មានរឿងមិនសូវល្អប៉ុន្មានដែរ សង្សារក៏មានច្រើន ហើយធ្លាប់បែកបាក់គ្នារាប់ភ្លេចទៀតផង តើអ្នកនឹងសម្រេចចិត្តប្រាប់អតីតកាលស្នេហារបស់អ្នកទៅគេត្រង់ៗ ដែរ ឬទេ បើស្នេហាចុងក្រោយនេះ ជាស្នេហាស្មោះរបស់អ្នក?
“មនុស្សស្រលាញ់គ្នាស្មោះមិនគួរមានអាថ៌កំបាំងជាមួយគ្នាឡើយ។ ប្រាប់គេតាមត្រង់ទៅ មានអ្វីត្រូវខ្លាច តែបើយើងព្យាយាមលាក់បាំងអតីតកាលស្នេហារបស់យើងចំពោះគេ មានន័យថា យើងមិនស្មោះនឹងគេបាត់ទៅហើយ”។ នេះជាការបញ្ជាក់ឲ្យដឹងពីលោក សុទ្ធ កុសល និស្សិតជំនាញអក្សរសាស្ត្រអង់គ្លេសនៃវិទ្យាស្ថានភាសាបរទេស។
លោក បានបន្ថែមទៀតថា៖ “ម្យ៉ាងទៀត បើសិនជាគេស្រលាញ់យើងស្មោះ នោះគេមិនប្រកាន់ពីអតីតកាលមិនល្អរបស់យើងឡើយ ទោះបីយើងធ្លាប់ខិលខូចយ៉ាងណា ក៏គេនៅតែទទួលយើងបានដែរ”។
គិត ដល់ចំណុចខាងលើ យុវជន ជន សុទ្ធា និស្សិតឆ្នាំទី១នៃសាកលវិទ្យាល័យន័រតុនវិញ ប្រាប់ថា៖ “ទោះបីជាយើងខំប្រឹងលាក់បាំងគេយ៉ាងណា ខ្ញុំជឿថា មុន និងក្រោយជៀសមិនផុតពីសង្សារដឹងទេ។ បើមិនប្រាប់ពេលនេះទេ ច្បាស់ជាមានរឿងពេលក្រោយជាមិនខានឡើយ”។
និស្សិតជំនាញ ព័ត៌មានវិទ្យាដដែលរូបនេះបានបន្តឲ្យដឹងទៀតថា៖ “ប្រាប់ការពិតទៅ ថាយើងធ្លាប់មានសង្សារប៉ុន្មាននាក់ ធ្លាប់ជ្រុលជ្រួសអីដែរអត់។ បើគេទទួលយកបាន ក៏បាន ហើយបើមិនបាន ក៏ហីទៅ។ កុំលាក់គេអី មិនល្អទេ”។
យល់ឃើញស្រដៀងៗគ្នានេះដែរ កញ្ញា គង់ គន្ធា អាយុ២០ឆ្នាំ ជាសិស្សថ្នាក់ទី១២នៃវិទ្យាល័យច្បារអំពៅ បាននិយាយថា៖ “គ្មានហេតុផលអ្វីត្រូវលាក់ បាំងប្រវត្តិស្នេហាជាមួយសង្សារនោះទេ ព្រោះអ្នកខ្លះស្រលាញ់គ្នា សម្លឹងមើលឃើញដល់អនាគត ទើបគេសួរពីអតីតកាលរបស់យើងដូច្នេះ”។
ឆ្លើយ តបទៅនឹងសំនួរថាតើអត់ខ្លាចប្រាប់ពីប្រវត្តិស្នេហាមិនល្អ របស់ខ្លួនទៅគេត្រង់ៗ ហើយគេទទួលយកអត់បាន គន្ធា បានពន្យល់ថា៖ “រឿងហ្នឹងយើងមើលដែរ។ បើសិនជាគេស្រលាញ់យើងស្មោះមែន ដាច់ខាតត្រូវតែប្រាប់គេតាមត្រង់។ តែបើគេគ្រាន់តែជាមនុស្សចង់លេងសើចជាមួយយើង មិនចំាបាច់ប្រាប់ពីប្រវត្តិពិតឲ្យគេដឹងនោះទេ”។
ទោះ បីជាយ៉ាងណា យុវជន ប្រាក់ បញ្ញារិទ្ធិ អាយុ២៤ឆ្នាំ មានស្រុកកំណើតនៅខេត្តតាកែវ បានបញ្ចេញទស្សនៈប្រឆាំងទៅនឹងទស្សនៈទាំងអស់ខាងលើថា៖ “ដាច់ខាតមិនត្រូវប្រាប់ពីប្រវត្តិយើងទៅគេទាំងអស់នោះទេ។ បើអាចកុហកគេបាន គួរតែនិយាយកុហកខ្លះទៅ“។
បញ្ញារិទ្ធិ បានបន្ថែមទៀតថា៖ “ពេលខ្លះការកុហកមិនមែនសុទ្ធតែមិនល្អទាំងអស់នោះទេ តែបើសិនជាយើងប្រាប់គេទាំងអស់ នៅពេលដែលមានរឿងឈ្លោះប្រកែកគ្នាគេប្រាកដជាលើកយករឿងយើងធ្លាប់ មានសង្សារមកឌឺឲ្យយើងជាមិនខានឡើយ”៕
ចុះមិត្តយុវវ័យវិញ ប្រាប់តាមត្រង់ ឬលាក់បាំង?
អត្ថបទ៖ យិន សំបូរ
0 comments:
Post a Comment