ប្រភពមកពី៖ news.sabay.com.kh
កីឡាករ សេន ប្រភស្សរៈ អតីតខ្សែបម្រើក្នុងឈុតជម្រើសជាតិយុវជនក្រោមអាយុ ១៦ ឆ្នាំ (U-16) របស់កម្ពុជា ឆ្នាំ ២០០៩ – ២០១០ បានចុះកិច្ចសន្យារយៈពេល ១ រដូវកាល ជាមួយក្រុម Greater Lowell United FC ក្នុងលីកបាល់ទាត់ National Premier Soccer League (NPSL 2015) លំដាប់ទី៤ របស់សហរដ្ឋអាមេរិក។
សេន ប្រភស្សរៈ ចុះកិច្ចសន្យាជាមួយក្លិបថ្មីកាលពីសប្ដាហ៍មុន
ប្រាប់ Sabay មកពីទីក្រុង Lowell រដ្ឋ Massachusetts កីឡាករអាយុ ២១ ឆ្នាំខាងលើថា នេះជាជំហានដំបូងរបស់ខ្លួនលើទឹកដីសហរដ្ឋអាមេរិកប៉ុណ្ណោះ ដោយប្រកបអាជីពជាមួយក្លិបដែលមានភាគហ៊ុនជាជនជាតិព័រទុយហ្គាល់ មួយនេះ។ គេជាកីឡាករអាស៊ាន តែម្នាក់គត់ដែលលេងក្នុងក្លិប Greater Lowell United FC ក្រោយមានការណែនាំពីមិត្តភ័ក្ដិម្នាក់ជាជនជាតិអ៊ីរ៉ាក់ ដែលជាកីឡាករនៅទីនោះ ប្រាប់ដល់គ្រូបង្វឹក រហូតដល់ថ្ងៃចុះកិច្ចសន្យា កាលពីសប្ដាហ៍មុន តែម្ដង។
តាមពិត ប្រភស្សរៈ បានចេញទៅរស់នៅជាមួយឱពុកបង្កើតរបស់ខ្លួនក្នុងទឹកដីសហរដ្ឋអាមេរិក កាលពីសីហា ឆ្នាំ ២០១៤ កន្លងទៅ ក្រោយបញ្ចប់អាជីពជាកីឡាករបាល់ទាត់របស់គេនៅកម្ពុជា ជាមួយក្លិប Albirex Niigata Phnom Penh។
និយាយពីអាជីពបាល់ទាត់នៅកម្ពុជា វិញ សេន ប្រភស្សរៈ ជាកីឡាករយុវជនថ្នាលរបស់ក្លិប ព្រះខ័នរាជ (ស្វាយរៀង) មុនផ្ទេរទៅជួយក្រុមត្រាយអាស៊ីភ្នំពេញ (Cambodian Tiger) ឡើងពីក្របខណ្ឌក១ ក្នុងឆ្នាំ ២០១៣។ ក្រោយមកទៀតគេបានជាប់ជាសមាជិករបស់ក្លិបភ្នំពេញក្រោន មុនទៅចូលរួមជាមួយ Albirex Niigata កាលពីរដូវកាលមុន។
កាលពីអាយុ ១២ ឆ្នាំ រូបគេមានក្ដីប្រាថ្នាចង់ក្លាយជាកីឡាករបាល់ទាត់ខ្មែរម្នាក់លេងនៅលើទឹកដីសហរដ្ឋអារមេរិក ហើយឥឡូវនេះបានសម្រេចដូចក្ដីបំណងហើយ។ ប៉ុន្តែអ្វីដែលគេចង់បានបន្ទាប់គឺក្លាយជាសមាជិកក្នុងក្លិបណាមួយនៃលីកបាល់ទាត់កំពូលអាមេរិក Major League Soccer (MLS) ក្នុងថ្ងៃអនាគត។ គោលបំណងសំខាន់របស់គេគឺ ចង់បង្ហាញពីអ្វីជារបស់ខ្មែរ នៅលើទឹកដីអាមេរិក។
សេន ប្រភស្សរៈ (លេខ១០) កាលជាប់ជម្រើស U-16 ជម្រើសជាតិ
ខ្សែបម្រើរូបនេះដឹងថាក្លិបថ្មីរបស់គេ មិនសូវល្បីបើធៀបនឹងក្លិបខ្លាំងៗ នៅអាមេរិក ប៉ុន្តែគេនឹងខិតខំបញ្ចេញសមត្ថភាពឱ្យបានល្អ ទោះជាពេលវេលាហ្វឹកហាត់ជាន់គ្នាជាមួយការងារក្រៅម៉ោង ឬ ត្រូវប្រកួតក្រោមតំណក់គ្រាប់ព្រិលក៏ដោយ។
ប្រភស្សរៈ ជាកីឡាករឈុត U-16 របស់កម្ពុជា ជំនាន់ កីឡាករ ចាន់ វឌ្ឍនាកា (បឹងកេតអង្គរ), ហួយ ផល្លីន (ស្វាយរៀង) និង ប្រាក់ មុន្នីភារុណ (អគ្គស្នងការដ្ឋាននគរបាលជាតិ) ជាដើម ដោយធ្លាប់ចេញទៅប្រកួតវគ្គជម្រុះពូល G នៃពានរង្វាន់ទ្វីបអាស៊ី 2010 AFC U-16 Championship ជាមួយ ក្រុម កូរ៉េខាងជើង, វៀតណាម, កូរ៉េខាងត្បូង និង មីយ៉ាន់ម៉ា និង ម្ចាស់ផ្ទះថៃ ក្រោមការដឹកនាំរបស់លោកគ្រូបង្វឹកជនជាតិជប៉ុន Teshima Atsushi៕
អត្ថបទ៖ ម៉ឺន រស្មី
រូបថត៖ ផ្ដល់ឱ្យ
ប្រភស្សរៈ ជាកីឡាករឈុត U-16 របស់កម្ពុជា ជំនាន់ កីឡាករ ចាន់ វឌ្ឍនាកា (បឹងកេតអង្គរ), ហួយ ផល្លីន (ស្វាយរៀង) និង ប្រាក់ មុន្នីភារុណ (អគ្គស្នងការដ្ឋាននគរបាលជាតិ) ជាដើម ដោយធ្លាប់ចេញទៅប្រកួតវគ្គជម្រុះពូល G នៃពានរង្វាន់ទ្វីបអាស៊ី 2010 AFC U-16 Championship ជាមួយ ក្រុម កូរ៉េខាងជើង, វៀតណាម, កូរ៉េខាងត្បូង និង មីយ៉ាន់ម៉ា និង ម្ចាស់ផ្ទះថៃ ក្រោមការដឹកនាំរបស់លោកគ្រូបង្វឹកជនជាតិជប៉ុន Teshima Atsushi៕
អត្ថបទ៖ ម៉ឺន រស្មី
រូបថត៖ ផ្ដល់ឱ្យ
0 comments:
Post a Comment