មានប្រភពមកពី៖ news.sabay.com.kh
ក្រុមបាល់ទាត់ជម្រើសជាតិកម្ពុជាបានធ្វើដំណើរទៅដល់ទឹកដីកោះម៉ាកាវហើយកាលពីល្ងាចមិញ បន្ទាប់ពីបានធ្វើដំណើរទៅកាលពីព្រឹកម្សិលមិញដើម្បីប្រកួតជើងទី២ពោលគឺ៣ថ្ងៃបន្ទាប់ពីកម្ពុជាទទួលបានជ័យជម្នះនៅជើងទី១ក្នុងទឹកដីរបស់ខ្លួន។ មុនជំនួបជើងទីពីរ គ្រូបង្គោលរបស់ក្រុមទាំងពីរសុទ្ធតែបង្ហាញគោលជំហរជឿទុកចិត្តរៀងៗខ្លួនសម្រាប់ការទទួលបានជ័យជម្នះ ប៉ុន្តែក៏បង្ហាញពីក្តីបារម្ភខ្លះៗដែរ។
លោក Tam Tao San គ្រូបង្វឹកម៉ាកាវ
គ្រូជម្រើសជាតិម៉ាកាវលោក Tam Tao San បាននិយាយក្នុងសន្និសីទកាសែតក្រោយការនៅស្តាតចាស់កាលពីថ្ងៃទី១២ មីនាថា លោកទទួលស្គាល់កម្ពុជាពិតជាលេងបានល្អមែនសម្រាប់ជើងទីមួយ ប៉ុន្តែជាការប្រកួតក្នុងទឹកដីខ្លួនឯងប៉ុណ្ណោះ។ បាល់ទាត់គឺមិនអាចច្បាស់មួយរយភាគរយទេ អ្វីៗក៏អាចកើតឡើងបានដែរ។ ជើងទីមួយ កម្ពុជាអាចរកបាន៣គ្រាប់ត្រឹមរយៈពេល៣០នាទី ប៉ុន្តែនៅទឹកដីម៉ាកាវវិញមានរហូតដល់៩០នាទីដើម្បីវាយបករហូតទទួលបានជ័យជម្នះវិញ។
លោកគ្រូសញ្ជាតិម៉ាកាវនិយាយថា ៖«កីឡាករកម្ពុជាដែលធ្វើខ្ញុំចាប់អារម្មណមានលេខ៩ (ឃួន ឡាបូរ៉ាវី ,លេខ៧ (ប្រាក់ មុន្នីឧត្តម) និង លេខ១១ (ចាន់ វឌ្ឍនាកា) តែខ្ញុំមិនចង់និយាយពីពួកគេទេ ខ្ញុំផ្ដោតសំខាន់លើក្រុមរបស់ខ្ញុំវិញ តើធ្វើយ៉ាងណាឲ្យឈ្នះសម្រាប់ការប្រកួតជើងទីពីរ»។ លោកបន្ថែមថា លោកនឹងរៀបចំកូនក្រុមរបស់លោកឲ្យបានល្អជាងជើងទីមួយដើម្បីទទួលបានលទ្ធផលសម្រាប់ជើងទីពីរ។
លោក Lee Tae Hoon គ្រូបង្វឹកកម្ពុជា
ចំណែកគ្រូបង្វឹកជម្រើសជាតិកម្ពុជា លោក Lee Tae Hoon បានលើកឡើងថា ការប្រកួតជើងទីពីរលោកពុំព្រួយបារម្ភអ្វីច្រើនឡើយដោយសំអាងលើជ័យជម្នះជើងទីមួយ ដូច្នេះលោកក៏មានសង្ឃឹមដែរសម្រាប់ជើងទីពីរ។ ប៉ុន្តែលោកបញ្ជាក់ថា ៖«ចំណុចសំខាន់ដែលខ្ញុំខ្លាចបំផុតនោះគឺកត្តាអាកាសធាតុ»។
ការប្រកួតជើងទីពីរនឹងប្រព្រឹត្តទៅនៅកីឡដ្ឋាន Estádio Campo Desportivo ក្នុងក្រុង Taipa នាថ្ងៃទី ១៧ ខែមីនា វេលាម៉ោង៨យប់ (ម៉ោង៧ យប់នៅកម្ពុជា)៕
អត្ថបទ ៖ស្រី សុវណ្ណដារ៉ា
0 comments:
Post a Comment